*Mike Eman kier bin cu un Sociaal Cultureel Planbureau pero el a lubida e rapport “Bo Aruba” di ARA
ORANJESTAD, Aruba 1 November 2023: Parlamentario Ricky Hoek tabata basta critico ora el a trece dilanti, durante un conferencia di prensa di Fraccion di MEP, e tema tocante e proposicion di Sr. Mike Eman pa bin cu un Sociaal Cultureel Planbureau (SCP).
Hoek a bisa cu mester ta hopi cauteloso ora cu Sr. Eman ta bisa cu e kier bin cu un Sociaal Cultureel Planbureau. Na Aruba ya caba tin instancianan hopi importante manera Algemene Rekenkamer Aruba (ARA) cu a publica e rapport “Bo Aruba, een onderzoek naar de projecten en een weergave van risico’s” na 2018.
Referente na e articulo anterior, a menciona e rapport “Bo Aruba” di ARA. Si habri y mira e rapport aki, lo keda cu wowo tur na awa, Ricky Hoek a expresa. Aruba a keda cu finansas habraca y mal gasta caminda cu por wak sr. Eman, tempo cu e tabata Minister President, y cu e tabata tin tur oportunidad pa 8 aña largo pa hiba Aruba den un bon rumbo. Kisas e tabata tin bon intencionnan, pero tabata intencionnan cu a costa Pais Aruba Afl. 1.6 biyon florin.
CONSECUENCIANAN NEGATIVO
Parlamentario Hoek a referi na e punto 1.3.4 riba pagina 15 di e rapport, cu e ta considera mas critico di tur. Aki e rapport ta adverti cual ta e risico pa e consecuencianan financiero negativo pa Pais Aruba. Si ARA na 2018 a papia di e consecuencianan negativo, awe nos ta bibando e y cu e debenan ta hopi hopi grandi. Riba esaki, ARA ta bisa cu e desaroyonan aki no tabata sostenibel y ta proyectonan cu a costa demasiado placa y awe Aruba ta sinta cu e consecuencia di esakinan. Sr. Eman te ainda no kier acepta cu ta su gobernacion a hinca Aruba den e situacion aki, Parlamentario Hoek a agrega.
Sr. Eman no a tene cuenta cu e rapport di ARA, ni cu e consehonan di Raad van Advies ni cu consehonan di Oficina di Estadistica (CBS). Den e rapport ta wak caminda cu no tabata tin un presupuesto bon skirbi di loke ta e proyectonan cu AVP tabata tin. Tabata tin un total di 10 proyecto cu tabata dividi den 241 mini proyecto, di cual awendia no por sa mes di hopi di nan, a señala. Di otro banda, AVP no por a garantisa ni duna responsabilidad na e gastonan cu a wordo uza. ARA ta haya importante cu e ministernan tambe mester a duna suficiente informacion durante henter e proceso na Parlamento di Aruba. Na ningun momento nan gobierno a duna Parlamento e informacionnan necesario, Parlamentario Hoek a bisa.
Ricky Hoek a reitera cu pa loke ta e ponencianan di Sr. Eman, Gobierno di Aruba no por carga un Sociaal Cultureel Planbureau na e momentonan aki. Loke si mester haci ta traha prome na entre otro independisacion di CBS caminda tin profesionalnan califica y cu pa añanan ta traha riba cifranan y ta duna conseho na gobierno.