ORANJESTAD: Recientemente, Minister di Enseñansa y Deporte Endy Croes a ricibi Sr. Wilfario “Willy” Willems, kende a baha cu pensioen despues di a traha 29 aña pa Gobierno di Aruba. Directiva di Instituto Biba Saludabel y Activo (IBiSA), Sr. Wladimir Wolff y Sr. Jessy Beukenboom tambe tabata presente den e ocasion aki. Durante e encuentro, Minister Endy Croes a entrega Sr. Willy un reconocemento pa su excelente servicio durante tur e añanan aki. Desde aña 2001, Sr. Willy Willems a cuminsa traha cu IDEFRE cu awendia ta IBiSA. Ademas di esaki, Sr. Willy den su tempo tabata un atleta y a gana diferente careda den e transcurso di e añanan, entre otro, careda di 10 km den un tempo di 32:54m/s, 5km den un di 16:17m/s y 18km den un tempo di1:02:59. Tres aña sigui Sr. Willy a gana Premio Oro Aruba, di aña 1982 pa 1984. Banda di esaki, di aña 1997 pa 2013 Sr. Willy tabata entrenado di taekwondo y a yuda e hisa e nivel di taekwondo tanto na Aruba como internacional. Minister Endy Croes ta indica cu Sr. Willy ta un ehempel pa otronan. Sr. Willy tabata semper presente na trabou y cu hopi pasion y amor a aporta den desaroyo di deporte di Aruba. Minister Endy Croes ta gradici Sr. Willy Willems pa su contribucion den e desaroyo di deporte di Aruba y ta desea Sr. Willy pa gosa di su pensioen merecidamente.