ORANJESTAD: Diadomingo 29 di october, a tuma luga e di dos (2) edicion di e Awareness Ride organisa pa Biking Squad Aruba. E recorido di 44 KM a inicia 6 or di mainta for di ex Bushiri Beach Hotel y a bay rumbo Noord. E meta di e Awareness Ride ta pa conscientisa automobilista – y ciclistanan pa ora nan ta uza caminda pa ambos ta consciente di e reglanan di trafico, nan siguridad y pa duna otro respet. Tambe, pa e doñonan di cacho tene cuenta cu nan mascota pa e ta den cura mirando cu nan por ataca e ciclistanan cu consecuencia negativo. Alrededor di 350 ciclista di 8 diferente grupo a participa. Minister Endy Croes tabata presente e mainta aki y a participa den e prome 10 KM di e recorido di conscientisacion. Minister Endy Croes a expresa cu e ta apoya iniciativanan asina pa conscientisa Pueblo di Aruba. Pa finalisa, Minister Endy Croes ta felicita Biking Squad Aruba y IBISA cu e exitoso proyecto di conscientisacion.
