ORANJESTAD: Diahuebs anochi, na Renaissance Convention Center a tuma luga e di dos edicion di e Proline Baseball Aruba’s Draft Night. Na e prome salida di e Proline Winter league 2022 un total di cuater (4) ekipo y alrededor di cien (100) hungado a participa. E ceremonia di apertura tabata uno interactivo, unda cu Minister Endy Croes a hiba palabra na e ocasion special aki. E vision ta pa crea oportunidad y plataforma pa brinda oportunidad pa nos hobennan por wordo mira y scout pa e coachnan internacional. Ta di vital importancia pa e studiante atleta combina nan estudio y practica deporte. Minister Endy Croes a enfatisa cu ainda e por corda aña pasa ora cu el a reuni cu Sr. Kevin James. Durante e reunion Sr. James a presenta e idea aki y Minister Endy Croes a indica cu momento cu bo haya un plan nobo, bo mester asimil’e prome, pero Sr. James tabata asina positivo cu di biaha a compromete pa yuda den e campeonato aki.
Minister Endy Croes a expresa cu awe bo ta mira e fruto di e simia cu a planta. Den aña 2024 Proline a tuma un paso grandi unda a extende cu dos (2) categoria mas. Ademas di e Proline, awo tin Prospect League pa e hobennan entre edad di 13 pa 16 aña cu e meta pa brinda e hobennan aki e oportuninad pa haya un scol afo y kisas hasta haya un organisacion internacional cu por firma pa nan. Nos ta orguyoso cu tin un proyecto y/of programa asina. Tambe, a agrega e categoria: Proline Classico pa e hungadonan di 40+. E grupo aki di hungadonan ta esnan cu a haci nos baseball grandi y ainda ta activo. Proline kier brinda nan e oportunidad di briya.
E aña aki tin alrededor di tres cien (300) hungado den tres (3) diferente categoria. E torneo ta dedica na e rumannan Thiel esta; Sr. Johny, Sr. Feliz, Sr. Mariano, Sr. Wilfrido, Sr. Arie y Sr. Emiliano Thiel, kendenan den nan carera di baseball semper nan a resalta den diferente posicion cu nan a hunga. Por a presencia cu nan kerida mama Sra. Chaba Thiel tambe tabata presente na e ocasion special aki. Minister Endy Croes ta gradici Gobierno di Aruba, Lotto pa Deporte y tur stakeholder cu a yuda y a aporta pa asina den colaboracion nos por logra e bunita proyecto aki. Pa conclui, Minister Endy Croes ta gradici Sr. Kevin James y e ekipo di Proline Baseball Aruba pa e invitacion. Alabes, ta desea e hungadonan hopi exito den e torneo di Winter League 2023 cu ta inicia dia 5 di november proximo. Cu e deseo, disciplina, dedicacion y determacion ta logra! Hopi exito!
