Secretario General di MEP ta basta indigna riba e manera di hiba politica barata di cierto parlamentario y partidonan politico. Tin algun cu un ansha di morto pa bende Aruba cu Hulanda y hasta algun prensa comprometi ta laga nan wordo uza manera un condom. Prome bo core entrega Aruba na Hulanda a traves di un Rijkswet cu NO a traha na Curaçao tampoco Sint Maarten ta bisa hopi di bo como entreguista.
Curaçao desde 10-10-10 tin un RFT cu no a funciona:
Desde 10 di october 2010, tanto Curaçao y St Maarten a haya nan Status Aparte, cual ta uno diferente cu e Status Aparte cu Betico Croes a bringa p’e cu sosten di pueblo di Aruba den su totalidad. Hulanda a paga hopi debe di Curaçao y Sint Maarten y a tuma parti di e debenan over. Asina Hulanda a paga pa Nederlandse Antillen Awg. 1.539.348.403 y pa Curaçao Awg. 1.894.555.638, pues 3.5 BIYON of 3500 MIYON florin na debe a cambio cu Curaçao y Sint Maarten lo bay di acuerdo cu e Rijkswet RFT pa asina por tin e “financiële toezicht” riba e islanan aki. Por mira e informacion aki bek den publicacion di Staatsblad van het Koninkrijk der Nederlanden di aña 2010 # 354. Den rapport di Algemene Rekenkamer Hulanda Verantwoordingsonderzoek 2019 Koninkrijksrelatie (IV) en Bes-Fonds (H) por tuma nota con Algemene Rekenkamer Hulanda a critica e RFT, esta e Rijkswet bisando cu e no a funciona. Textualmente: ”Op 10 oktober 2010 heeft Nederland het overgrote deel van de schulden van de landen Curaçao en Sint-Maarten overgenomen, zodat deze landen na de staatkundige vernieuwing een financieel gezonde start konden maken. Om herhaling te voorkomen, zijn tijdelijke toezichtsconstructies ingesteld. Deze constructies lijken onvoldoende effectief. De aanwijzingen door de Rijks- ministerraad hebben niet geleid tot begrotingen die voldoen aan de afgesproken normen of tot een substantieel hogere kwaliteit van het financieel beheer. Ook de rapportages van de ingestelde evaluatiecommissies lijken alleen in beperkte mate aan te zetten tothet realiseren van verbeteringen. Een wezenlijk andere aanpak is nodig.”
Recomendacion di Algemene Rekenkamer Hulanda na e Minister di BZK riba e echo cu e Rijkswet na Curaçao no a funciona: “We bevelen de minister van BZK aan om te onderzoeken onder welke voorwaarden een integrale aanpak gericht op het bevorderen van economische groei, een beheerst begrotingsbeleid en een degelijk financieel beheer succes kan hebben.”
Pues riba algo cu NO a funciona na Curaçao awe Mansur, Marisol, Gerlien, Ryçond, Gunn hunto cu algun prensa cumpra, kier roga Hulanda pa introduci esaki pa Aruba cueste loke cueste. Nos no tin miedo di un supervision y ta pro pa bin cu algo cu ta traha y pa esey bo mester curashi pa negosha na drechi cu Hulanda y no simplemente hisa benta paso Hulanda di. No solamente mester tene cuenta cu e cifranan, pero tambe kico ta funciona y lo yuda Aruba di berdad como un isla cu un “kleinschalig economie”. Na Curaçao e “aanpak” a stroba hasta e crecemento economico. Pues, laga nos siña di erornan di pasado den Reino Hulandes y hunto traha riba un modelo cu SI ta funciona unda tanto Hulanda por tin su supervision, pero Aruba como pais tambe por keda desaroya unda cada conciudadano por forma parti di e desaroyo aki y por sinti esaki hasta den su cartera. Politica ta un arte y politica no ta pa tur hende, sigur no na esnan menciona mas ariba. Hunto nos lo logra!