MONTANA/SHABA:
Diamars algo pasa di 4 ‘or y mey di atardi, a yega un señora na Warda di polis na Shaba baña na sanger. E la splica polis cu su yiu cu problema mental a hink’e.
Un persona den un Chevrolet Spark a topa e mama tur na sanger y mesora a hinca e mama den auto y a hibe warda di polis. E Chevrolet Spark tabata tur na sanger.
Mesora a manda algun patruya di polis na e cas na Montaña.
Na e cas polis a bin topa cu e yiu sin paña bisti ta cana den cura di e cas, e yiu tabata tin un corta basta profundo. Muy probablemente e lo a corta su mes.
Mesora polis a detene y a pidi pa presencia di ambulance cu urgencia mirando cu e yiu tambe tabata seriamente herida. Por a mira riba e porta di e cas y riba vloer dilanti di e cas varios rastro di sanger.
Recherche, departamento tecnico di polis tambe a wordo pidi na Warda di Shaba pa haci e investigacionnan necesario riba e auto y tambe na e cas caminda e hincamento a tuma lugar.
Dos patruya di polis a core dilanti di ambulance cu a transporta e yiu, pa asina habri caminda pa nan yega lihe hospital, mirando cu e tabata den un estado critico.
E yiu ta un Respaldo pashent, unda e situacion aki a bay completamente for di man investigacion lo mester deduci esey.
Pregunta cardinal den e caso aki ta si e yiu a ricibi su medicamentonan necesario y na ora.
