Recientemente e directornan di tur hospital den Caribe Hulandes a reuni cu prof. dr. Ernst Kuipers, Minister di Salud, Bienestar y Deporte (VWS) di Hulanda y Abigail Norville, MSc, reemplasante Secretario-general di VWS, tocante e progreso di Dutch Caribbean Hospital Alliance (DCHA) – e aliansa entre e hospitalnan na Aruba (HOH), Corsou (CMC), Sint-Maarten (SMMC) y Boneiro (FM).
DCHA
Pa e directornan drs. Jacco Vroegop (HOH), prof. dr. Ingemar Merkies (CMC), drs. Giovanni Frans (FM) y drs. Felix Holiday (SMMC) e importancia di e colaboracion entre e islanan ta wordo mira como uno esencial na momento cu mester ta prepara como hospital pa ta exitoso den salud y bienester di e comunidad, siguramente den tempo di crisis. Door di comparti recurso, conocemento y experticio DCHA tin como meta pa logra aceso igual na cuido medicoriba cada isla. Banda di esaki ofrece tur habitante di cada isla calidad halto pa loke ta cuido di hospital y servicionan relata na cuido medico manera laboratorio, productonan di sanger y mas.
E colaboracion
Banda di e colaboracionnan local, tambe tin pa medio di VWS lasonan estrecho entre DCHA cu Reino Hulandes. E colaboracion aki ta ofrece e islanan y e hospitalnan na Aruba, Boneiro, Corsou y Sint-Maarten e oportunidad pa beneficia di e experticio y recursonan cu Reino Hulandes tin pa ofrece, y na mesun momento cada uno ta sigui mantene nan identidad unico.
Reunion exitoso
Explicitamente a menciona na momento di e reunion cu a tuma luga riba 2 di juli e situacion delicado cu ta encontra den dje door di e demanda creciente den cuido y e escasez creciente pa logra yega na personal. Ta esencial pa yega na loke ta un ‘same-level-playing field’ den condicionnan salarial y laboral ademas di ofrece educacion specialisa na nos yiunan di tera den loke ta enfermeria y tambe specialista. Door di enfoca riba e necesidadnan cu tin pa futuro y asina educa e yiunan di tera ta mantene e cultura y alabes ta logra yega na e volumen necesario di personal riba e islanan. Pa pashentnan tambe esaki ta un deseo mirando cu ora bo ta malo, bo ta desea di wordo yuda den bo idioma.
Durante e reunion a sigui traha riba trece igualdad den e necesidadnan y obstaculonan den loke ta compra di remedi riba tur isla pa loke ta ley y maneho. E compra conhunto di material, aparato y ekipo medico lo por yega na spaar placa y tambe tempo. Ademas a papia riba e intento pa e compra di un solo dossier electronico di pashent. Asina aki dato di pashent por wordo comparti mas facil, lihe y di forma safe entre e islanan den reino. Consecuentemente e cuido por conecta na un manera mas specifico ainda y centralisa pe pashent.
Por ultimo a trece pa dilanti riba 1 di juli den cuadro di e conmemoracion Keti Koti, esta un dia prome cu e reunion, y e discursonan di Rey Willem-Alexander na Hulanda y Minister Kuipers na Corsou, e balor di uni forsa como un extension pa crea oportunidadnan. Pues pa cada habitante di e islanan den Reino crea oportunidadnan y supera e pasado pa yega na un futuro mas bunita. Un bon cuido di salud ta esencial den esaki.
Minister Kuipers a duna di conoce cu e ministerio di VWS ta desea di ta un partner solido den crea y gara oportunidadnan, y den reforsa e cuido di salud riba e islanan. Ela expresa su gran aprecio pa e resiliencia enorme di tur personal den cuido riba e islanan y a gradici e directornan di hospitalnan pa nan compromiso cu e comunidad di Aruba, Boneiro, Corsou, Saba, St. Eustatius y St. Maarten.
Nota pa prensa:
E relato a ser retrasa pa motibo di e caida di gabinete na Hulanda. Pues pa e motibo ey e aprobacion di VWS Hulanda a tuma un poco mas tempo cu custumber.
Pa mas informacion contact Charlaine Huntington [email protected] , + 297 597 4402