Diasabra ultimo tabata un dia yen di pashent na poli Neurologia di Horacio Oduber Hospital (HOH). A duna informacion y asistencia den loke ta ‘follow up’ di un total di 19 pashent cu tin e aparato pa DBS, esta Deep Brain Stimulation. Durante e dia aki e team na poli Neurologia a traha hunto cu un ekipo di Medtronic Colombia cu ta e compania cu ta traha e aparato aki y cu a bin cu un update pe aparato. Tambe tabata presente Oduber Agencies cu ta encarga pa suministra loke cu e pashent mester den cuadro di e mashin. Y representantenan di UO AZV pa admira con awo Hospital mes tin e experticio pa haci e ‘follow up’ cu e pashentnan na Aruba mes.
DBS no ta pa tur hende
Neurologo Roberto Weiser ta splica cu “mayoria di e pashentnan cu mester di un aparato pa DBS na Aruba tin e enfermedad di Parkinson avansa y tin algun cu ta sufri di Distonia. Cerca e pashentnan aki remedi ya no ta funciona mas y pues nan ta bay Colombia pa asina haci e procedura neurocirurgico DBS.” Durante e operacion aki nan ta pone un aparato medico esta un ‘neurostimulator’ bou di cuero cu un waya cu ta pasa bay te den e cabes. E waya ta yega den e cerebro den e ‘subthalamic nucleus’. Eynan e ta duna impulsonan electrico constantemente y esey ta yuda kita e sintoma di temblamento y stijf cu e pashent tin. E DBS ta cambia e actividad cerebral di un forma cu e ta bou control y danki na e DBS ta logra mehora e calidad di bida.”
Aruba mes por
“Normalmente e pashent mes tin cu bay Colombia cada seis luna pa haci un ‘follow up’ pa mira con ta bayendo cu e aparato y si mester haci algun ahustacion pero awo por haci esaki na Aruba mes”, Neurologo Weiser ta conta. Su mes persona a sigui un training na Colombia pa asina por haci esaki na Aruba mes sin cu e pashent tin cu bay afo cada seis luna. Esaki ta mas comodo pa e pashent mes ya cu ta na cas y no mester bay pa tempo largo afo y ademas e ta yuda baha e gastonan medico di Aruba. “Como dokter nos ta keda purba pa ofrece mas cu nos por pa nos pashentnan riba nos isla mes”, dr. Weiser ta splica.
HOH y su team di profesionalnan un bes mas ta dal un paso mas pa dilanti pa por duna mas pashent cuido na cas mes, percura pa e experticio cu mester y na mesun momento baha e gastonan medico di Aruba. Tur esaki ta posibel danki na HOH su team dedica na traha duro cu amor y pasion y den mesun rosea eleva calidad di cuido.