Bushiribana: Diaranson den oranan trempan di mainta lo a bin topa cu un SUV marca Honda, color Blanco, e auto tabata para cara pa lama net panort di e ruina di Bushiribana, tambe por a nota cu e auto tabata gestart y e porta di auto tabata habri. Un par di meter patras di e auto tabata tin un homber den short benta abou den e tera, cu no tabata mustra di ta dunando señal di bida. Den e area unda e homber tabata benta por a nota rastronan sospechoso den e tera cu probablemente ta indica cu un posibel lucha lo por a tuma lugar eynan.
Polis y ambulance mesora a wordo avisa. Hopi lihe polis a yega na e sitio y pa sali for di tur duda cu por ta trata di un asesinato a pidi pa e departamentonan concerni presenta na e sitio pa cuminsa cu e investigacionnan necesario.
Na yegada di ambulance e paramediconan no por a haci nada mas pa e victima, pa motibo cu e no tabata duna señal di bida y a pidi pa un dokter. Dokter forensico Dr. Scholten a presenta y a constata morto.
Varios unidad di polis a yega na e sitio pa asina cera e area completamente pa asina e departamento tecnico di polis mesora a por a cuminsa cu e investigacionnan necesario.
Janine di Slachtofferhulp tambe tabata na e sitio pa atende cu cualke familiar o amistad di e victima cu lo por presenta.
Chek cu nos bek aki rato pa mas informacion oficial di parti autoridad.
