“Mi ta encurasha cada un di boso, pa bay eyfo y haci tur boso esfuerso pa logra cada un di boso metanan“
ORANJESTAD – Diabierna anochi, Prome Minister Evelyn Wever-Croes a atende e ceremonia di graduacion di EPI, sector “Hospitality and Tourism”, cu a tuma luga na Aruba Marriott Resort and Stellaris Casino. Na su yegada, Prome Minister a wordo ricibi pa Director di EPI, señora Ankie Danker. Na inicio di e cermonia oficial, Prome Minister tabata tin e oportunidad di duna un discurso, na unda el a dirigi su mes na e graduadonan, dunando nan un bunita conseho y deseando nan tur clase di exito den futuro.
E anochi tabata uno hopi special, na unda cada graduado a ricibi cu hopi orguyo nan diploma, cu ta simbolo di nan dedicacion y esfuerso durante añanan. Prome Minister hunto cu señora Tisa LaSorte di Aruba Hotel and Tourism Association (AHATA), a entrega cada graduado nan diploma, y a haci esaki dilanti di famianan, docentenan y demas graduado presente. Despues di a ricibi nan diploma, nan por a disfruta di un dushi cuminda, acompaña pa musica agradabel.
“Mi ta felicita cada un di boso cu e logro aki, y ta desea boso tur clase di exito cu cualkier decision cu boso tuma, sea di bay sigui studia of di cuminsa traha. Mirando cada un di boso awe nochi ta hiba mi bek na tempo cu ami a studia, un tempo cu hamas mi lo por lubida y cu lo mi carga den mi curason pa semper. P’esey mi ta encurasha cada un di boso, pa bay eyfo y haci tur boso esfuerso pa logra cada un di boso metanan. Purba na descubri bo potencialnan den e proceso di crea e miho version di bo mes. Mi ta desea cada un di boso tur cos bon pa cu e siguiente pasonan y cu tur boso soñonan wordo cumpli,” Prome Minister a expresa.
