E acuerdo aki ta brinda nos studiantenan di Aruba oportunidad pa eherce diferente estudio, entre otro, Facultad di Animacion, Arte y Diseño y Ciencia y Tecnologia.
ORANJESTAD: Dialuna atardi, Minister di Enseñansa y Deporte Endy Croes a firma un Memorandum of Understanding (MoU) pa prome biaha cu Sheridan College pa brinda nos studiantenan di Aruba oportunidad pa studia eynan. Minister Endy Croes ta felicita Minister di Plenipotenciario di Aruba situa na Washington, Sra. Joselin Croes cu desde dos aña atras a haci e contactonan aki pa por firma e tremendo MoU aki cu Sheridan College.
Minister Joselin a indica cu e acuerdo aki cu Sheridan College ta hopi importante pa Aruba, mirando cu e college ta ofrece estudio den diferente ramo cu ta nobo pa Aruba. Ademas di esaki, Sheridan College tin conexion grandi cu e islanan den caribe y nan ta sumamente contento cu a fima MoU cu Aruba. Cu e MoU aki, e studiantenan di Aruba por haya un descuento riba e tarifa di scol (schoolgeld). Minister Joselin Croes ta sigui bisa cu e beneficio di studia na Canada ta cu e studiantenan cu haya permiso pa studia na Canada por traha na scol of pafo di scol. Esaki por yuda e studiante paga su estudio. Tambe, e costo di camber ta rond di 800 pa 900 dollar Canades, cual ta mas economico compara cu Merca.
“Provost y Vice President Academic” di Sheridan College, Sra. Carol Altilia a expresa cu nan ta hopi entusiasma pa firma e MoU aki cu Aruba. Ta e prome acuerdo cu ta firma cu Aruba, cual ta habri oportunidad nobo pa e studiantenan di Aruba pa bay studia aya y experiencia diferente programa di calidad cu nan tin pa ofrece.
Sra. Anaita Mclntyre, “Senior International Coordinator” di Sheridan College tambe a indica cu nan ta hopi emociona di firma MoU cu Aruba y ta spera cu e studiantenan di Aruba por scoge pa studia na Sheridan College. Sheridan College tin mas di 130 diferente programa, entre otro, Facultad di Animacion, Arte y Diseño, Comercio, Ciencia y Tecnologia y estudio di Comunidad y Salud.
Pa conclui, e MoU aki cu a firma cu Sheridan College ta un gran logro pa Aruba, mirando cu e ta brinda e studiantenan di Aruba oportunidad di eherce diferente estudio cu ta nobo pa Aruba. Minister Endy Croes ta gradici esnan cu a contribui pa haci e acuerdo aki posibel y ta desea e studiantenan di Aruba cu scoge pa studia na Sheridan College hopi exito.
