Den Haag – Minister Plenipotenciario a haci recientemente un bishita di trabao na Zwolle pa papia cu diferente instancianan interesante. Asina e mandatario a tene un combersacion cu Roeland Kreeft manager wonen na SSH (Stichting Studentenhuisvesting), cu ta e fundacion na Hulanda cu ta huur 19 mil camber y vivienda pa studiante na diferente ciudad na Hulanda.
Minister Thijsen a cuminsa na splica cu e scarsedad di vivienda pa studiante tin su impacto riba e grupo di studiantenan for di Aruba cu ta bin Hulanda. Pesey Arubahuis conhuntamente cu Departamento di Enseñansa di Aruba y Minister Endy Croes di Enseñansa ta purba na yega na solucionnan pa nos studiantenan, con dificil esaki por ta.
Sr. Kreeft a bisa cu e tin comprension pa e situacion di studiantenan di Aruba pasobra nan ta biba pafor di Hulanda y lo ta hopi bon cu nan por dispone riba un camber prome cu nan bin Hulanda. Segun sr. Kreeft un manera pa logra esaki lo ta pa introduci un sistema di preferencia pa studiantenan Arubiano riba inscripcion pa un camber. Esaki sinembargo ta complica segun sr. Kreeft, pasobra un forma preferencial lo lanta hopi pregunta cerca e instancinan cu ta ofrece camber, incluso SSH.
Un opcion cu sr. Kreeft a bin cu ne, ta pa duna mas informacion na studiantenan riba e sistema di “hospiteer”. Esaki ta un sistema unda studiantenan por reacciona riba cambernan den un cas pa studiante. E prome 15 candidato mas halto riba e lista di inscripcion ta wordo yama pa un combersacion y for di nan ta escohe e candidato adecua pa biba den e cas. Sr. Kreeft a conta di un experencia cu SSH a haci cu studiantenan internacional pa mira con esaki ta traha. E resultado di e experencia tabata sumamente positivo; casi 80 porciento di e studiantenan internacional a keda acepta bou di e argumento cu nan tabata e candidato mas simpatico.
Lo ta importante, segun sr. Kreeft, pa duna informacion na e studiantenan Arubiano con e sistema di “hospiteer” ta traha; kico bo por spera di un cas pa studiante y con bo por presenta bo mes mihor, pa tin chens pa nan escohe abo. Tambe cu den un cas pa studiante, bo mester yuda na haci cushina, baño y gang limpi y tene cuenta cu un cas pa studiante ta consisti di aproximadamente 15 studiante, pues e por ta hopi druk.
Un otro punto cu sr. Kreeft a menciona cu tambe lo por yuda studiantenan na un camber ta cu SSH ta trahando riba un Plataforma central pa inscripcion pa tur instancia na Hulanda cu ta brinda camber y vivienda na studiantenan. Esaki ta brinda un bista general riba disposicion pa camber y vivienda. Unabes bo ta inscribe, segun sr. Kreeft e periodo di inscripcion por ta positvo pa si mas laat bo ta desea un apartamento. E experencia general ta cu studiantenan ta cuminsa biba e prome dos pa tres aña di nan estudio den un cas pa studiante of compleho di vivienda pa studiante, pero despues nan kier move pa un vivienda mas priva; riba nan mes.
Minister Thijsen a bisa cu e Plataforma aki lo por evita cu estafadornan riba mercado di vivienda pa studiante no por sigi perhudica studiantenan cu cambernan fantasma. Tambe e mandatario a gradici sr. Kreeft pa e reunion y cu lo bai mira con por implementa algun punto pa duna studiantenan Arubiano mas chens pa tin un camber asina cu nan yega na Hulanda. Esaki so por kita hopi dolor di cabes pa nos muchanan, segun Minister Thijsen.