Home » 16 aña di prison exigi pa hoben di 18 aña cu a tira mata Anthony Carti

16 aña di prison exigi pa hoben di 18 aña cu a tira mata Anthony Carti

by Admin
0 comment 193 views

ORANJESTAD – Awe mainta te den oranan di atardi, den Corte di Husticia a trata e caso penal cu Ministerio Publico a cuminsa contra e hobennan A.R.(19) y K.A.S. (17) Nan ta wordo acusa cu riba 4 December 2022 den oranan di marduga, a tira y cap cu machete Anthony Carti (Juni Maton), kende a muri banda di Sand Bar.

ARUBA NATIVE por a compronde cu A.R. a tira Carti dos biaha y K.A.S. a kap Carti tres biaha cu machete.
PELEA DI GANG

Hues a puntra A.R. si ta berdad cu a tira mata Carti. El a admiti. Hues a puntra kico a sosode. A.R. a bisa Hues cu nan tabata 4 den auto di mama di B. y a bay dal un bocht. Nan a bay na Fat Tuesday y un hende di un gang tabata saca nan potret. Nan a bay for di eynan y a bay na e auto. Nan a mira cu tabatin un gang para eynan. Nan sigui cana y ripara tin un grupo mas grandi ta bin nan tras. Ta e gang di Juni Maton pero A.R. no conoce. El a cana pasa banda di nan sin haci nada. Banda di nan auto, tabatin pelea entre e dos gangnan.

HAYA ARMA BENTA ABAO

Segun A.R., ora e tabata cana banda di acera despues di a cruza caminda, el a haya un arma benta abao. El a coy esaki y sigui cana. Hues a bisa cu ta straño cu otro hendenan no a haya esaki. Hues a bisa cu e ta haya esaki un storia hopi straño cu A.R. ta haya e arma y no ta check esaki. Un rato despues e ta coy e arma y tira mata. Hues ta haya dificil pa kere cu a haya e arma abao benta. Fiscal a haci A.R. preguntanan entre otro pakico no a laga e arma benta abao. Pakico no a bisa Polis cu el a haya un arma. Fiscal a remarca cu A.R. a bisa cu e no sa di arma pero a coy esaki y tira. El a bisa cu riba video di seguridad ta mira A.R. ta tira cu e arma manera un hende cu sa di arma.

TIRA MATA

A.R. y K.A.S. a declara cu nan tabata bayendo na e auto y un homber a bin riba nan y puntra si nan tambe kier a bringa. Nan a bis’e cu nan no tin problema cun’e. Nan a bay auto, habri auto. E momento ey A.R. a mira Carti cana bin riba dje. Segun A.R., el a bisa Carti, cu e no kier tin problema. Asina mes, Carti a dal’e den cara y el a cay abao. A.R. a sigui bisa cu el a mira gang a para rond di nan. E momento ey Carti a bay dal K.A.S. y K.A.S. a saca machete y dal Carti cu esaki y core bay. Carti a bolbe dal A.R. y segun A.R., den su spanto el a saca e arma, carga esaki y los un tiro riba Carti. Ora Carti a bolbe riba dje y hinca man den zij, el a bolbe tira. Ora el a bay carga e arma el a mira un bala a cay. Despues di e di dos tiro, tur hende a plama. E ora ey K.A.S. a core bay riba Carti. Carti a sali core pero no ora el a cuminsa cruza caminda, el a cay abao. K.A.S. a bay riba Carti y dal e dos biaha na su cabez y despues core bay.

Hues a bisa cu patologo a constata cu un tiro a bora curazon di Maton cu a causa su morto.

DEMANDA DI DAÑO

Abogado mr. Carlo a representa e famia di e victima. E abogado a bisa Hues cu e ruman muher y e 4 yiunan di e victima a haci demanda di daño. El a haci demanda di gasto di entiero y mantencion di e muchanan. E abogado a exigi 11 mil florin pa entiero. Pa tratamento psycologico pa emocionnan cu e ruman muher a sufri pa e forma con a mata su ruman, el a exigi 15 mil. Pa alimentacion di e 4 yiunan a menciona sumanan grandi cu ta varia entre 6650 y 50 mil florin.

PASA VIDEO DI MATA CARTI

Fiscal a pasa videonan di seguridad cu a haya for den vecindario di Sand Bar. Por a mira con Carti a dal A.R. y despues K.A.S. a atake cu un machete. Despues A.R. a tira dos biaha. Tur hende a plama for di otro. Por a mira Carti para y K.A.S. ta core bay riba dje cu e machete. Carti a cuminsa core y cay riba caminda riba e zebrapad. Un rato despues K.A.S. a yega y dal Carti 2 biaha cu machete na su cabez y core bay.

FISCAL

Fiscal a bisa cu riba 4 December 2022 na Sand Bar a cuminsa un pelea. Turistanan a mira e pelea. Despues e pelea a sigui riba parkinglot y tiro a cay. A.R. a tira dos biaha y riba zebrapad mey mey caminda, Carti ta cay. K.A.S. ta bay dal Carti dos biaha cu machete riba cabez. Riba social media por a mira tata di A.R. cu ta na Hulanda, ta bisa cu A.R. ta un soldad. Fiscal a bisa cu increibel cu tur esaki tabata riba social media. Ora tiro a cay a crea un panico y hendenan tabata core pa loco. Hopi testigo a declara loke nan mira di e pelea y tiramento. Tambe a mira cu ora e victima cay riba caminda, un otro ta bay dal’e dos biaha cu machete. Fiscal a bisa cu un tiro a dal Carti den pulmon y un den curazon. Ademas Carti a sufri un cap formal den cabez. Carti a fayece door di tiro den curazon.

Fiscal a mustra cu A.R. a bisa cu si Carti no a dal’e, e tiramento no a sosode. K.A.S. a bisa cu si Carti no a dal’e, e no lo a kap e cu machete.

TIRA DI SERCA MATA

Fiscal a bisa cu ta bon cla cu A.R. a tira Carti riba distancia cortico. K.A.S. a kap Carti na su man y despues ora Carti a cay riba caminda, el a dal’e 2 biaha den cabez. Fiscal a bisa cu e ta haya cu K.A.S. ta complice di mata. Nan a bay hunto den auto for di e lugar y a deshaci di e arma. A haya e balanan den un tas. Fiscal a sigui bisa cu no por papia di a actua den defensa propio. Nan tabata arma durante e pelea. Fiscal a bisa cu e no ta kere e storia cu A.R. a haya e arma benta abao. Fiscal ta haya cu e forma cu K.A.S. a dal Carti cu e machete cu forza, ta un intento di mata.

DEMANDA DAÑO

Fiscal ta haya e demanda di daño di entiero 11 mil florin ta na su lugar. El a sigui bisa cu e demanda pa alimentacion pa yiunan y demanda di daño inmaterial, e ta compronde e trauma emocional cu e famia a pasa aden. Fiscal ta haya cu un parti lo mester paga y e resto declara no admisibel pa asina nan cuminsa un caso civil. El a bisa pa aproba 15 mil florin y e resto no admisibel. El a pidi impone medida di pago.

EXIGENCIA

Fiscal a bisa cu pa K.A.S. mester exigi castigo hubenil. E dia di e matamento e tabatin 17 aña. Fiscal a exigi pa K.A.S. 4 aña di prison. Pa A.R.(18), Fiscal a bisa cu e ta usa castigo di adulto. El a bisa cu e incidente a sosode den sector turistico y hopi hende tabata presente. Fiscal a exigi 16 aña di prison pa A.R.

Hues a bisa cu e ta bay studia e caso y dentro di algun siman lo por tin sentencia.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio