Home » Te cu luna di mei 2023 AUA Airport a conoce un recuperacion di 104% den trafico di pasahero

Te cu luna di mei 2023 AUA Airport a conoce un recuperacion di 104% den trafico di pasahero

by Admin
0 comment 110 views

Aruba Airport Authority N.V. (AAA) a tuma nota di un publicacion cu varios medio local a publica relaciona cu e desaroyonan positivo den transporte aereo na Aeropuerto di Aruba. Regularmente AAA ta comparti e desaroyonan aki cu su socionan externo den e industria di aeropuerto y di aerolinea. Ainda no a comparti localmente e desaroyonan mas recien cu e stakeholders y prensa local. No obstante, aeropuerto su aña 2023 a cuminsa riba bon pia, mirando cu a ricibi mas di 560.000 pasahero den e prome cinco lunanan di e aña, esaki ta indica un recuperacion di 104% den comparacion cu e mesun periodo pero di aña 2019.
Queen Beatrix International Airport (AUA) ta sigui experencia un demanda pisa despues di un aña 2022 sumamente exitoso. Compara cu e prome cuater lunanan di aña 2019, trafico a aumenta cu un 4.2%, indicando un recuperacion di 104%. Durante e periodo ey, AUA a ricibi mas di 20 aerolinea, operando mas di 4.000 vuelo y conectando Aruba na mas cu 30 diferente destinacion.
Tambe por a mira un crecemento fuerte den AUA su mercadonan clave, particularmente den Norte America y Latino America. E mercado Norte Americano a conoce un aumento di 4.7% den e prome cinco lunanan di aña 2023, Merca a conoce un aumento di 3.5% y Canada un 57.3% compara cu aña 2019. E mercado Latino Americano ta creciendo riba un bon ritmo, el a alcansa un recuperacion di 101% den comparacion cu aña 2019, cu Colombia aumentando u n 9% compara cu e mesun period.
E cantidad premira di pasahero y movecion di avion cu lo atende cu ne pa e aña 2023 ta mustra hopi positivo y prometedor y ta cla pa alcansa un recuperacion di 108% pa aña 2023 compara cu aña 2019. Esaki lo nifica un crecemento di 13% compara cu e trafico y pasahero cu a atende cu ne na aña 2022.
Cu e desaroyonan positivo aki, AUA ta sigui mira un interes significativo y oportunidad pa expande e mercado actual, asina ta permiti mas desaroyo y diversificacion den e mercadonan.

Merca
American Airlines, AUA su aerolinea di mas grandi, recientemente a anuncia un aumento den su capacidad pa Aruba. Cuminsando na juni di e aña aki, e aerolinea lo opera vuelo dobel diario den su ruta Charlotte-Aruba, ta bay aumenta di 1 pa 8 vuelo pa siman pa e ruta di Philadelphia-Aruba, den comparacion cu aña 2019. Ademas, e aerolinea lo aumenta servicio den su ruta di Miami-Aruba den luna di september y october, bayendo di vuelo diario pa dobel vuelo diario.
JetBlue su di dos aerolinea di mas grandi, a anuncia cu lo regresa cu e ruta di Newark-Aruba, cu ta bay inicia dia 17 di juni di aña 2023 y ta bay ta operacional riba diasabra.
Spirit Airlines tambe a confirma un aumento den servicio den su ruta di Fort Lauderdale-Aruba, for di 2 vuelo pa siman riba diaranson y diasabra, pa vuelo diario durante e temporada di winter 2023/2024.
Recientemente, Delta Airlines a anuncia cu lo aumenta su capacidad y operacion di vuelo pa e temporada di winter. Entre e anuncionan aki, e aerolinea a indica cu lo tin un aumento den frecuencia pa Aruba cuminsando januari di aña 2024 door di agrega un di dos vuelo diario pa su ruta di Atlanta-Aruba.

Canada
Cu e anuncio di Air Canada, caminda lo reinicia su ruta Toronto-Aruba, Canada tambe lo mira crecemento na aña 2023. Air Canada lo tin tres vuelo pa siman cuminsando november di e aña aki. WestJet tambe a anuncia un aumento den frecuencia di vuelo pa e temporada di winter 2023.

Latino America
Aeropuerto di Aruba tambe lo yama bonbini na diferente aerolinea e aña aki, un di nan ta LATAM Group, cu e anuncio di vuelo non-stop entre Aruba y Lima,Peru cuminsando na december di e aña aki. E servicio lo cuminsa cu un frecuencia di tres vuelo pa siman, opera pa un Airbus 320, cu ta conta cu un capacidad di 174 pasahero (12 premium economy y 162 den economy of cu un Airbus 319 cu ta conta cu un capacidad pa 138 pasahero ( 12 premium economy y 126 den economy). Lima, Peru ta un destino cu actualmente Aruba no ta provee pero e lo bira AUA su tercer hub Latino Americano conectando e isla cu Brasil, Argentina, Chile, Uruguay y Paraguay.
Recientemente Wingo a confirma cu e lo aumenta su conectividad entre Aruba y Latino America, pa e motibo ey nan a lansa e servicio di Aruba pa Cali, Colombia cuminsando den e luna di juli di aña 2023. Esaki ta bira e aerolinea su di tres ciudad na Colombia, Wingo lo opera e rutanan di Bogota-Aruba, Medellín-Aruba y Cali-Aruba.
Avianca tambe a aumenta su conectividad entre Colombia y Aruba, door di aumenta e servicio na nos isla di 9 pa 11 vuelo pa siman den su ruta Bogota-Aruba pa e periodo di zomer.
Copa Airlines tambe a anuncia un aumento den e frecuencianan di vuelo pa nos isla, di vuelo diario pa 9 vuelo pa siman den su ruta di Aruba-Panama. Ademas, den luna di december nos isla lo conoce un cremento.
“E vuelonan adicional y e rutanan nobo lo sigui conecta Aruba cu e destinacionnan internacional, reenforsando asina Aeropuerto di Aruba su compromiso di busca oportunidad nobo y expande su alcance global”, asina Jo-Anne Meaux-Arends, Aviation Business Development Executive di AAA a duna di conoce.
Pa mas informacion tocante nos vuelonan di luna por subi nos website https://www.airportaruba.com/flight-schedules

Tocante AUA Airport
AUA Airport ta un di e aeropuertonan mas ocupa den region Caribe cu mas di 22 diferente aerolinea operando pa Aruba contribuyendo na mas cu 2.5 miyon pasahero pa aña y cu buelonan pa 22 diferente ciudad 34 diferente destinacion directo rond di mundo. Di e mercadonan u AUA Airport ta sirbi 78% ta for di Merca y Canada, 11% for di Latino America, 6% for di Europa y 4% for di Antia Hulandes te cu luna di mei 2023. AUA Airport ta reconoce cu esaki ta danki na e economia stabiel, clima politico, hospitalidad, populacion diversifica y siguridad general di nos isla. AUA Airport su aspiracion ta pa bira un aeropuerto sostenibel, sigur y a prueba di futuro, den region Latino Americano & Caribense, brindando un luga di trabou confiabel, facilidad di un aeropuerto moderno y un servicio excelente cu ta e refleha hospitalidad Arubiano, contribuyendo na un futuro prospero pa Aruba.

Conoce mas di loke ta pasando na AUA Airport door di bishita www.airportaruba.com y conecta cu AUA airport riba Twitter.com/Aruba_Airport, Facebook.com/ArubaAirport, Instagram.com/arubaairport/

Fecha, 13 di juni, 2023

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio