Home » Associate Appreciation Week 2023: Aruba Marriott a celebra un siman cu tur asociado

Associate Appreciation Week 2023: Aruba Marriott a celebra un siman cu tur asociado

by Admin
0 comment 86 views

 

Siendo un di e hotelnan mas grandi di Aruba, cu riba 1300 empleado den servicio directo, Aruba Marriott Resort & Stellaris Casino a organisa un siman di evento pa honra su empleadonan. E ta un forma pa subraya e rol importante cu cada un ta hunga den e nivel halto di calidad di servicio cu ta ofrece diariamente na e huespednan di e hotel.

Dialuna 29 di mei 2023 Aruba Marriott a inicia su Associate Appreciation Week. E aña aki un bes mas Aruba Marriott a celebra un siman completo cu diferente actividad pa su asociadonan. Di e manera aki ta gradici e asociadonan di Aruba Marriott pa nan dedicacion continuo.

Ruthline Theysen, Complex Director of Human Resources, a comenta cu e Associate Appreciation Week a bay hopi bon. E asociadonan di Aruba Marriott a atende masalmente na e actividadnan. Aruba Marriott tin 1300 asociado dividi entre Aruba Marriott Resort & Stellaris Casino, Ocean Club y Surf Club. Tabata henter un siman di actividad cu a varia den orario pa asina tur asociado por disfruta cu nan colega. E Associate Appreciation Week ta un manera pa yama danki na un y tur pa e trabou cu nan ta eherce pa Aruba Marriott.

E “Associate Appreciation Week” di Aruba Marriott a inicia dialuna cu un lunch den e grandioso ballroom cu un menu masha dushi mes. Tur asociado a disfruta di e lunch. Tambe a cuminsa cu nan career journey, a duna e asociadonan un mapa den un estilo di scavenger hunt. E asociadonan di Aruba Marriott tabatin 1 siman pa bay cera conoci cu diferente departamento cu Aruba Marriott ta conta cu ne. Ademas por a haci un tarea chikito pa mira cua lo bira nan next move den nan carera.

Hofi di Aruba Marriott
Diamars, cu ta e di dos dia, a organisa un evento comunitario na Santa Rosa. Un grupo di mas o menos 60 asociado a yega mainta trempan pa asina planta mata. Varios di e matanan cu a planta ta protehi pa Aruba. Ademas di planta mata Aruba Marriott a adopta un area y lo mantene durante aña. E area adopta ta hiba e nomber di “Hofi Aruba Marriott”. Durante atardi a tene un “Let’s Play Game” den e ballroom di Aruba Marriott. Den e atardi aki e departamentonan a competi contra otro pa gana premionan fabuloso. Por a mira diferente departmaneto y asta ehecutivonan disfruta di e wegenan.

A disfruta di pelicula
Diaranson mainta trempan e ballroom di Aruba Marriott tabata completamente yena cu e asociadonan pa asina nan hunga bingo. Tabatin bailamento y entretenimento di Tyson Croes. E asociadonan a pasa bon y baila. Tur hende tabatin un sonrisa riba nan cara, esaki ta loke ta haci Aruba Marriott contento. Anochi tabatin un evento pa famia na Drive Inn. A treat tur asociado hunto cu nan famia pa mira e pelicula di “The Super Mario Bros”. Ademas e asociadonan a haya treat di popcorn, hamburger, hotdog y mas pa asina nan pasa tempo cu nan famia. Motibo cu a dicidi pa organisa un evento ta pasobra Aruba Marriott ta gradici e sosten cu e famia ta duna na e asociadonan.

Wega di kickball
Diahuebs anochi a organisa un evento for di 8:00 pm te cu diabierna 4:00 am. E tabata un evento di kickball caminda 12 departamento a participa den e wega. Tabatin alrededor di 500 hende a yega na Centro di Bario Noord sea ta pa hunga of pa apoya. Tur placa recauda na bar a bay pa e team di softball di Centro di Bario Noord. Aruba Marriott a percura pa por tin foodtruck presente pero tambe koffie pa nan tur disfruta sin pega soño. Tur colega a disfruta di evento di kickball.

E hende na prome luga
E ultimo evento a tuma luga diabierna anochi y tabata un wega di bowling. Ademas tabatin un silent disco, algo practicamente nobo y trending. Esnan cu no kier a hunga a disfruta di musica y pasa rato cu nan colega. E tabata un evento cu a bay hopi bon. Pafo tabatin photobooth pa e asociadonan saca potret. Internacionalmente ta celebra Associate Appreciation Week den luna di Mei. Marriott International ta cumpliendo 96 aña y esey ta e motibo cu nan ta celebra tur aña den luna di Mei.

Ruthline Theysen a menciona cu Mr. Bill Marriott semper ta bisa “put people first”, esaki ta nifica cu si bo take care di bo asociado, nan lo take care di e huespednan y asina tur hende ta contento.

Dedica na e asociado
Por ultimo Ruthline Theysen, Complex Director of Human Resources, a gradici e team di Human Resources mirando cu nan a organisa e siman aki dedica na tur asociado. Ademas a gradici na e asociadonan cu a participa den e evento y tambe na e management team y team ehecutivo cu a coopera y asisti na varios evento.

Aplica awe mes!
Aruba Marriott semper ta buscando colega nobo pa forma parti di nan ekipo. Si abo ta buscando trabou, subi riba e website di Aruba Marriott: https://careers.marriott.com/ y haya chens di uni na e famia grandi di Aruba Marriott.

Tocante Aruba Marriott Resort & Stellaris Casino
Aruba Marriott Resort & Stellaris Casino a habri na aña 1995 cu 411 camber y a añadi tres camber na 2018. Na aña 1999 a habri Ocean Club cu 311 camber y na aña 2004 a habri Surf Club cu 900 camber. Na tur, e famia di Marriott Aruba ta consisti di mas o menos 1200 empleado den servicio directo. E compleho di Marriott Aruba ta esun di mas grandi den henter Caribe, tanto den cantidad di camber como den cantidad di empleado.

 

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio