Home » Minister Thijsen a reuni cu Minister di Enseñansa Endy Croes

Minister Thijsen a reuni cu Minister di Enseñansa Endy Croes

by Admin
0 comment 114 views

Den Haag  – Den su combersacionnan pa informa e miembronan di Conseho di Minister di Gabinete Wever-Croes II, Minister Plenipotenciario mr. Ady Thijsen a reuni cu Minister di Enseñansa y Deporte Endy Croes. Akinan tambe Minister Thijsen a ilustra su vision pa Arubahuis y Aruba na Hulanda cu entrega di un buki cu tur e informacion di e contactonan y terenonan cu por conduci na formanan di cooperacion den futuro.

 

Despues di a duna un introduccion riba su vision y maneho pa cu Arubahuis ela papia cu Minister Croes riba e situacion pa cu nos studiantenan na Hulanda. Akinan e problematico di camber ta e prome punto cu a bin dilanti. Banda di cu e studiante y nan mayornan ta na prome instante responsabel pa busca un camber, Minister Thijsen a bisa cu lo mester mira na busca manera unda Gobierno tambe por yuda e muchanan den e esaki. E mandatario a bisa cu den hopi combersacion cu ela hiba cu burgemeesternan di municipionan na Hulanda, e contesta ta cu e problematico ta grandi, complica y cu un solucion a corto plaso no ta realistico, pero Arubahuis conhuntamente cu Minister Endy Croes ta haciendo tur loke ta posibel pa soluciona e problematico serio aki,

Minister Endy Croes a bisa cu su ministerio a start conhuntamente cu Setar pa bin cu un app pa studiantenan por registra y asina Gobierno por haya un impresion unda nan ta bai studia. 

 

Otro punto cu a keda trata durante di e combersacion ta con pa trece nos studiantenan bek despues cu nan keda cla cu nan estudio. Esaki pa logra yena e funcionnan cu ta nesesario pa motibo di e “vergrijzing” cu ta e personanan cu ta bai cu pensioen. Tambe segun Minister Thijsen lo mester bin cu un plan pa e mercado laboral, unda mester detecta cual funcionnan Aruba mester dje den futuro y encurasha e hobennan pa sigi e direccion di estudionan aki pasobra tin oportunidad di trabao pa nan na Aruba. Den esaki tambe, segun Minister Thijsen, lo ta bon pa analisa e guia actual di e studiantenan na Hulanda, pa yega na guia durante henter nan studio. Esaki pa asina garantisa cu nan ta keda den bista di Arubahuis y Gobierno di Aruba cu e meta pa nan bin bek. E plan aki ta exigi tambe sosten di Ministerio di Labor y di sector priva.

Minister Endy Croes a bisa cu riba e tereno aki ya caba a instala un Plataforma Enseñansa y Labor cu lo mester traha na plannan pa yega na un strategia con lo por trece mas Arubiannan bek na Aruba pa fortifica e mercado laboral. 

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio