ORANJESTAD: Diasabra mainta, Minister di Enseñansa y Deporte Endy Croes hunto cu Prome Minister Evelyn Wever-Croes y Minister Rocco Tjon a acudi na e clausura di Campeonato 2022-2023 di futbol den categoria U-5 y U-7 na Compleho Deportivo Frans Figaroa. Minister Endy Croes a indica cu e tabata un tremendo wega y cu ta contento di por mira e muchanan cuminsa di un edad asina trempan den deporte. Tabatin un cantidad di persona presente cu a bay apoya nan ekipo preferi. Na final di e wega, Minister Endy Croes hunto cu Presidente di AVB Sr. Randolf Lacle y e miembronan di directiva a haci entrega di medaya na e muchanan cu a participa durante Campeonato 2022-2023. Ademas di esaki, coach di cada ekipo a ricibi un medaya. E mandatario di Deporte ta gradici e mayornan cu ta apoya nan yiu den e deporte bunita aki y ta hiba nan tur training. Pa finalisa, Minister Endy Croes ta felicita Sr. Randolf Lacle y miembronan di directiva di Arubaanse Voetbal Bond (AVB) cu a organisa e campeonato aki. Alabes ta aplaudi e coach- y muchanan cu e tremendo wega.
