Parlamentario drs. Mervin Wyatt-Ras: Nos grandinan mester keda haya e cuido cu nan mester y merece

For di dia 15 di februari ultimo, fraccion di AVP y MAS den Parlamento a pidi Minister di Asunto di Grandinan, Ursell Arends pa bin duna cuenta di kico ta pasando cu Stichting SABA. E peticion aki ta uno cu a con ta cu sosten di fraccion di MAS. Lamentablemente, mescos cu otro peticion cu oposicion ta haci, ta ignora pa Gabinete Wever-Croes II.
Te dia 26 di april ultimo, Minister Arends a manda un carta pa fraccion di AVP indicando cu a raiz di un caso sumario cu SABA a entama, e no por papia tocante e situacion cu ta reinando entre e fundacion cu ta maneha cas di cuido pa grandi y gobierno di Aruba.
Dialuna mainta, parlamentario drs. Mervin Wyatt-Ras a forma parti di e conferencia di prensa den cual Partido di Pueblo Arubano (AVP) a denuncia e conflicto cu tin actualmente entre Gabinete Wever-Croes II y SABA. E politico ta kere firmemente cu , na luga di bay den pleito legal caminda abogado liga na gobierno ta sali beneficia, minister mester busca alternativa den sector di salubridad pa yega un solucion cu no ta compromete e salud y bida di nos grandinan.
Ta asina cu anteriormente SABA tabata ricibi for di Pais Aruba un subsidio anual di 32.5 miyon florin. Den presupuesto 2023, cu a inclui un cantidad medida pa asina gobierno por a gaba cu un surplus, locual gobierno si no a papia di dje ta cu a corta entre 3 pa 4 miyon florin for di e suma cu ta duna SABA pa aña pa nan por opera.
SABA a demostra den su añanan di existencia cu e ta sumamente necesario. Tambe a demostra cu den transcurso di tempo, e constelacion di cliente a cambia. Awendia nan tin problema mas compleho caminda 75% di e clientenan tin demencia of un combinacion di cinco pa seis malesa cronico. Esaki ta informacion cu Wyatt-Ras a obtene personalmente durante un bishita na e facilidad; bishita cu, por cierto, no a conta cu gran asistencia for di miembronan di fraccion di coalicion.
“E cambio di situacion entre cliente ta hustamente loke a pone SABA amplia su servicio pa inclui loke ta yama verpleeghuiszorg cu ta consisti di dokter ademas di otro profesional di cuido. Asina SABA no a bira mas djis un cas di cuido caminda e grandinan por biba, pero un centro di cuido pa nan condicion medico. E cuido a transforma den verpleging,” Wyatt-Ras a indica “y esey no ta algo cu SABA a inventa, pero cu ta e necesidad real di nos comunidad”.
Otro informacion cu a bin dilanti ta cu e cantidad di persona cu condicion di demencia a subi den ultimo aña cu un promedio di 34% y esey ta nifica cu hustamente no por tin menos placa pa haci e trabou. Costo di bida a subi, cuminda a subi, awa, coriente, gas, personal, tur gasto a subi. Cu ki curason bo ta corta den SABA? Ta loke e parlamentario di AVP ta puntra. Mientras tanto e lista di spera na SABA y otro centro di cuido di grandi ta creciendo y lo crece ainda mas cu e recorte aki den nan presupuesto.
Tampoco ta descarta cu esaki ta djis un strategia politico cu cual MEP kier caba cu RAIZ caminda e minister di salud a pone SABA den man di Arends bou capa di asunto di grandi hunto cu e carteranan di ambiente y transporte. Practicamente e minister su man ta mara paso e no tin nada di bisa ni den salud publico, ni tampoco den asunto social. Ta similar na loke a sosode cu clientenan di Respaldo. “E gobierno aki ta bin cu pretpaketten pa minister cu nan por traha paso mester di otro minister,” asina Wyatt-Ras a expresa.
E parlamentario ta wak espacio pa spaar den presupuesto y toch cubri tur necesidad. Un di nan ta den e manera con ta cumpra remedi, pa consolida esaki obteniendo un miho prijs, den e maneho di tratamento medico den exterior caminda ta haci gasto innecesario.
Wyatt-Ras ta spera cu pronto lo yama e reunion publico riba e topico aki y cu lo haya oido di otro miembronan di parlamento pa cu esaki, specialmente for di esunnan di coalicion. “Cuestiona nan gobierno y no djis reacciona riba loke oposicion ta haci,” asina e parlamentario a conclui bisando.