Diasabra atardi, den un esfera un poco emocional pero tambe di gratitud y solidaridad, mandatarionan, famianan, cuerpo policial y pueblo di Noord a bini hunto pa inaugura un plaza nobo bou di e nomber Plaza Tino Ruiz. A scoge e fecha di diasabra 6 di mei cu ta coincidi cu e fecha natalicio di e hoben agente Tino Ruiz den feliz memoria. Cu e plaza aki a rindi honor na agente policial hoben Tino Ruiz den feliz memoria y su famia.
Tino tabata un polis hoben ehemplar, cu un dedicacion grandi na su trabou. Tur colega policial cu tabata conoc’e lo bisabo tambe cu Tino semper tabata servicial y ta haci su trabou di curason. Agentenan policial ta mas cu un persona den uniform. Nan ta tata, mama, ruman, yiu of amigo. Pues ta tur dia un tata, mama, ruman, yiu of amigo di un di nos ta pone nan bida na peliger y haci sacrificionan grandi pa sirbi y proteha nos comunidad.
E trabou di polis ta un yamada y tin su riesgonan y sacrificionan cu ne. E trabou aki ta rekeri di profesionalismo, pasenshi, dedicacion y pasion. Pero tambe hermandad. Na e momento cu un agente policial subi warda, e y su famia, tin un deseo. Esey ta pa e por regresa cas bek sano y salvo. Asina mes, na 2017, apesar cu nos ta consciente di e peligernan, nos a wordo confronta cu e hecho cu Tino, Tino su famia, y su coleganan a paga e prijs maximo, Tino no a regresa su cas despues di su warda.
Danki na su mayornan cu a forma y educa un yiu, un agente policial ehemplar, cu awe lo keda biba den nos memoria y ehempel maximo di e ser humano y agente policial ideal. Un legacia cu lo keda bibo pa semper. Meta di e plaza aki, no solamente ta pa percura cu Cuerpo Policial haya e balor cu nan merece den nos comunidad completo, pero tambe, pa cada ciudadano wordo recorda cu e trabou di Cuerpo Policial no ta uno facil y cu nan tambe ta tata, mama, ruman y yiu. Mas aun, pa e memoria di e agente policial hoben Tino Ruiz por fungi tambe, pues e plaza aki, como e simbolo pa sigui cultiva e hermandad den Cuerpo Policial.
