Naturalesa ta e base di nos existencia, e ta e fuente di recurso y ecosistema cu ta sostene bida riba tera. Sinembargo, actividadnan di ser humano a bin ta resulta den un degradacion severo riba medio ambiente poniendo peliger riba salud y bienestar di nos planeta y tur su habitantenan.
Ministerio di Naturalesa, conhuntamente cu Directie Natuur en Milieu (DNM) a traha riba un concepto di ley pa ancra Derecho di Naturalesa den constitucion di Aruba. E concepto di ley a wordo crea den consulta cu organisacionnan y expertonan local y internacional. Despues di e prome dialogo cu Parlamento y Conseho di Minister, Minister Arends a entrega e concepto di ley na Departamento Legislativo, esta Directie Wetgeving en Juridische Zaken (DWJZ) dia 21 di april 2023 conmemorando Dia di Mama Tera cu accion concreto pa restaura e relacion entre ser humano y naturalesa.
Unabes Departamento Legislativo revisa e concepto pa controla e calidad y efectividad di legislacion, por inicia e consulta cu stakeholders di varios sector. Stakeholders lo haya e oportunidad pa dialoga y duna critica constructivo riba e concepto di ley. Stakeholders ta entre otro Miembronan di Parlamento, organisacionnan ambiental, comercio y esnan cu ta practica ley. Den e manera aki Minister Arends ta involucra ciudadanonan pa e concepto di ley final ta un logro pa pueblo henter.
Raad van Advies ta un organo di gobierno cu ta duna conseho y puntonan di atencion pa cu leynan proponi. Bureau di Minister Arends, Directie Natuur en Milieu y Departamento Legislativo ta adapta e concepto di ley a base di sugerencianan di stakeholders y presenta esaki na Raad van Advies. Despues di esaki, Minister Arends lo entrega e proposicion di ley y conseho di Raad na Parlamento. Miembronan di Parlamento por haci pregunta por escrito y ricibi contesta di Minister Arends den preparacion pa e reunion publico. Parlamento ta trata tur proposocion di ley den un reunion publico unda representantenan di pueblo ta hiba dialogo y debate. Esaki ta e ultimo paso den e proceso legislativo pa ancra Derecho di Naturalesa den constitucion unda Miembronan di Parlamento ta vota na fabor of contra di e proposicion di ley. Pa motibo cu ta un intento pa cambia nos Constitucion, e proposicion ta rekeri sosten di dos tercera parti di Parlamento.
Aunke e proceso legislativo ta uno largo, no obstante, Minister Arends ta compromete pa proteha Aruba su naturalesa. Door di introduci Derecho di Naturalesa den nos constitucion, lo sigura cu naturalesa tin un status legal pa ciudadanonan por cana pa defende naturalesa como tambe e derecho di tur habitante pa biba den un ambiente saludabel.
Reconociendo Derecho di Naturalesa den nos sistema legal ta un paso fundamental pa protehe e integridad ecologico di nos planeta, protehe Aruba su Naturalesa y asegura un futuro sostenibel pa e proximo generacionnan.
