Home » Fiscal lo bay cuminsa caso pa kita 260 mil florin di e sospechoso Colombiano. A pospone caso grandi di falsiciacion di actanan di casamento y divorcio

Fiscal lo bay cuminsa caso pa kita 260 mil florin di e sospechoso Colombiano. A pospone caso grandi di falsiciacion di actanan di casamento y divorcio

by Admin
0 comment 208 views

ORANJESTAD – Den Corte di Husticia di Aruba, dentro di algun luna lo trata e caso penal cu Ministerio Publico a cuminsa contra un homber Colombiano. Ta trata aki di e homber Ocaris Tobon Hernandez, biba na Aruba, kende ta wordo sospecha di ta e cabezante di e operacion di falsificacion di actanan di divorcio, casamento y actanan di notario.

   ARUBA NATIVE por a compronde cu actanan a wordo falsifica pa tanto extranhero como Arubiano. Fiscal den su acusacion presenta den ta mustra cu tin 40 acta di divorcio, casamento y di notario. Sinembargo e ta bisa tambe cu tin indicacion cu tin 100 caso pero el a duna instruccion pa para cu investigacion.

CENSO A BATI ALARMA

Ta asina cu personal di Censo a descubri e operacion aki y a bati alarma cu a conduci na detencion di Tobon Hernandez Fiscal a bisa Hues cu e motibo cu a caso ta “regie” (preparacion pa e caso penal) ta pasobra cu recien e procesverbaal a keda cla. E procesverbaal ta consisti di masha hopi documentonan di interogacionnan di personanan y otro investigacionnan cu a haci. Fiscal a bisa cu e ta conciente cu no a haya tempo suficiente pa studia e caso bon y pesey a bin cu e caso “regie”.

Fiscal a splica cu ta personal di Censo a constata cu tin cosnan no corecto riba e actanan y a notifica autoridad Colombiano. Autoridad Colombiano, despues di haci e investigacionnan necesario, a confirma cu e actanan tabata falsifica. Asina a cuminsa cu e investigacionnan cu a culmina den detencion di Tobon Hernandez.

TIN COMO 100 CASO

Fiscal a sigui bisa Hues cu na dado momento el a duna instruccion pa stop cu e investigacionnan pasobra di e 40 casonan cu tin contra Tobon Hernandez, tin indicacion cu tin mas o menos 100 caso cu a keda descubri. Ta mustra cu ta hopi falsificacionnan a sosode.

E acusacion cu Fiscal a presenta contra Tobon Hernandez ta, cu hunto cu un of otronan, varios biaha a falsifica un o mas actanan di casamento y of diviorcio y actanan di notario entre 1 Januari 2015 te 19 Augustus 2022 na Aruba y of Colombia.

LO BAY KITA 260 MIL FLORIN

Fiscal a anuncia cu e sospechoso Tobon Hernandez por spera cu Ministerio Publico lo cuminsa un caso pa kita propiedadnan di dje, balora na 260 mil florin. Esaki ta e suma cu despues di un investigacion financiero, ta calcula cu e sospechoso a gana durante e 5 añanan.

HOPI HENDE VICTIMA

Por a compronde cu hopi hende a confia den Tobon Hernandez cu e actanan ta autentico y investigacion haci ta mustra cu e operacion di Tobon Hernandez a gaña hopi hende y tambe na Censo. Danki Dios cu personal atento na Censo na dado momento a bin ripara cu cosnan no ta corecto.

Door di e falsificacion di actanan, hopi extranhero ta haya status Hulandes y hasta haya pasaporte Hulandes. Tambe tin Arubianonan cu a confia den e actanan y awor ta sali perhudica.

CASO POSPONI

Fiscal y Hues tabata kier sa si abogado di e sospechoso lo tabatin peticionnan pa haci investigacion pa cu su cliente. E abogado a bisa Hues cu ta recien e tambe a haya tur e documentonan. El a bisa Hues cu e kier keda cu e derecho, cu despues di a studia tur e documentonan, ainda e lo por haci peticion pa investigacion cu e kier.

Hues a bay di acuerdo y a bay check den agenda di casonan penal di Corte, ki dia lo por trata e caso aki. Fiscal a bisa cu e ta kere cu lo mester henter un dia pa tratamento di e caso aki.

Hues a propone pa tratamento di e caso tuma lugar dia 25 Augustus 2023. A caso a keda pospone pa 25 Augustus 2023 mientras cu Tobon Hernandez lo keda encarcela den KIA.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio