ORANJESTAD – Diamars Minister di Turismo y Salud Publico sr. Dangui Oduber a tene un conferencia di prensa na AZV. A anuncia cu desde 1 di mei 2023 a para e recorte riba dunadornan di cuido y ta cuminsa duna bek e 5.5 porciento na tur e dunadornan di cuido na Aruba.
Minister Oduber a splica cu na comienso di aña a dirigi un carta na AZV pa informa nan cu gobierno tin intencion di kita e recorte y alaves pidi nan pa duna un conseho riba esaki. Na su turno AZV a prepara diferente scenario y a presenta esakinan na Ministerio di Salud Publico. Despues di varios evaluacion di tur e scenarionan, despues di a sinta cu AZV y despues di a informa CAFT, Minister Oduber a tuma e decision pa para e recorte.
Recorte 60 miyon
Minister Oduber a recorda riba e hecho cu durante e pandemia na aña 2020 tabata hopi dificil pa Aruba. Aruba tabata e di dos pais na mundo cu mas a keda afecta economicamente pa e pandemia door cu nos ta depende completamente di turismo. Pa yuda tur esnan cu a perde trabou cu FASE y cu subsidio di salario gobierno mester a haci un prestamo di 916 miyon florin serca gobierno di Hulanda. Danki na esaki Aruba por a sobrebibi e pandemia, pero ora bo haci prestamo, esaki ta bin cu condicionnan hopi fastioso mara na dje cu no ta tur ora bo ta di acuerdo cu nan.
Un di e condicionnan hopi dificil y fastioso tabata cu gobierno lo mester a corta 60 miyon florin pa aña (5 miyon pa luna) den cuido medico anto den pleno pandemia. Minister Oduber a expresa cu semper gobierno a diferencia di opinion cu Hulanda pero tabata algo cu gobierno mester a haci pa por cumpli cu un di e condicionan di Hulanda pa asina haya e prestamo.
Decision dificil
Minister Oduber a splica cu e decision pa introduci e recorte di 5.5 porciento riba e dunadornan di cuido tabata uno hopi dificil pa tuma. E mandatario a reconoce e tremendo trabou cu e sector di cuido a haci no obstante e hecho di e recorte di 5.5%. Nan a keda brinda un excelente cuido y servicio na tur e aseguradonan. Minister Oduber a gradici e dunadornan di cuido pa a mustra comprension pa cu e situacion dificil cu tabata tin.
Crea espacio pa trahadornan
E mandatario ta di opinion cu e decision di para e recorte ta bay crea espacio pa duna bek tambe na empleadonan den cuido medico. E decision aki ta un alivio grandi pa e dunadornan di cuido. Nan por aumenta nan volumen un biaha mas y manteniendo e mesun calidad di servicio di semper. Nos hospitalnan ta bay opera optimalnente, nos dokternan di cas, nos dientistanan, nos terapistanan tur ta bay haya un alivio.
Con ta sigui
E pregunta di tur hende lo ta, con ta sigui awor cu e recorte di 60 miyon?
Minister Oduber a splica cu desde januari 2023 cu a reuni cu CAFT a mustra nan e situacion y nan tambe a mustra mas comprension pa e situacion den cuido medico. CAFT a aplaudi e hecho cu Ministerio di Salud Publico y AZV ta haciendo nan parti pa maneha e gastonan di cuido mihor.
Minister Oduber a indica cu e no ta facil pa maneha e gastonan, esaki ta debi cu Aruba tin un poblacion cu ta den embehisimento y un poblacion cu no ta esun di mas saludabel. Tur esaki ta pone un presion grandi riba e gastonan di AZV continuamente. No obstante e gastonan di AZV ta bou control asina e mandatario a duna di conoce.
Segun e proyeccionnan den 10 aña di tempo Aruba su poblacion di esnan riba 65 aña lo aumenta di 10% pa 20%. Esaki ta un indicacion cla cu e peso riba e fondo di AZV tambe lo aumenta automaticamente.
Minister Oduber a indica cu a splica CAFT cu Aruba tin un plan pa futuro cu ta demostra con lo maneha e gastonan di cuido! E deseo ta pa para e recorte di 60 miyon florin y bai over na un perspectiva di un plan multi-anual .
E mandatario a sigui bisa cu gobierno di Aruba ta preparando un estimacion di e plan multi-anual pa asina fin di luna di juni 2023 comparti esaki cu CAFT. Den esaki Aruba ta bay haci uzo di un economista specialisa den cuido cu lo bay yuda cu tur e calculonan necesario.
E objetivo final ta pa Aruba keda garantiza cu e fondo di AZV ta keda uno sostenibel, pa asina por mantene e pakete di seguro y maneha e gastonan na un manera responsabel.