Home » E enfoke principal di e ganadonan di 2022 ta bienestar (‘wellness’): E GANADONAN DI ‘ARUBA SIGNATURE EXPERIENCES’ 2022 A WORDO ANUNCIA

E enfoke principal di e ganadonan di 2022 ta bienestar (‘wellness’): E GANADONAN DI ‘ARUBA SIGNATURE EXPERIENCES’ 2022 A WORDO ANUNCIA

by Admin
0 comment 119 views

 

Na 2021, A.T.A. a anuncia e programa ‘Aruba Signature Experiences’ cu e meta pa stimula desaroyo di experiencianan nobo den diferente ‘niche’ cu por atrae mas turista y genera mas entrada pa nos isla y na mes un momento tin un impacto mas abou ariba nos medio ambiente. Na 2022 a anuncia e prome ronda di participantenan cu a gana, y e siguiente ronda e cuminsa den september 2022.

A.T.A. y Qredits Aruba a invita personanan cu kier bira entrepreneur of ta entrepreneur caba, cu tin un idea innovativo pa un experiencia unico den e areanan di romance, bienestar, eco-turismo, of cultura, pa participa den e programa aki.

Entrepreneurnan a participa na e Small Business Academy di Qredits Aruba, unda cu nan a siña diferente habilidadnan necesario pa cuminsa y maneha nan propio negoshi. Despues di completa e curso aki e entrepreneur por a sigui na e siguiente stap cu ta aplica pa financiamento na Qredits Aruba.

Entre e participantenan a selecta e ganadonan cu a ricibi como premio e sosten di Aruba Tourism Authority cu fondonan, recursonan y guia personalisa, pa asina promove nan producto of servicio unico na nos bishitantenan.

Basa riba criterianan manera; con unico e experiencia ta, si ta cumpli cu regla di ROPV, e nivel di ‘High value- Low impact’, y si por ta operacional den maximo 6 luna, a scoge dos (2) ganado. Ambos ganado ta enfoca riba e ‘niche’ di bienestar/ ‘wellness’.

A.T.A. ta contento di anuncia e siguiente ganadonan di ‘Aruba Signature Experiences’. Un pabien ta bay na Sr. Ryan Leliendal y Sra. Gianina de Freytas di Dimondi y Sra. Nannelle van der Spil y Jerome van der Spil di Transition 2 Health.

E siguiente parti di e programa ta inclui sesionnan cu un consultant di ‘Business IQ’ cu ta specialisa den e area di ‘niche’ pa asina brinda ayudo na e ganadonan, ofreciendonan e sosten pa asina finalisa e detayenan pa haci e ideanan aki aun mas exitoso. A.T.A. lo asisti nan tambe den e parti promocional pa asina resalta visualmente cu contenido relevante y unico. Lo sigui tambe brinda apoyo na e ganadonan den area di mercadeo.

Expectativanan y necesidadnan di bishitantenan a cambia den transcurso di e ultimo añanan unda bishitantenan ta mas enfoca riba experiencianan unico. Despues di e pandemia esaki a bira mas importante ainda ya cu mas hende ta considera vakantienan como oportunidadnan pa crea recuerdonan inolvidabel hunto cu nan sernan keri.

 

 

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio