Home » Rays of Hope: Fortalecemento di e esfuersonan di conservacion di manta ray

Rays of Hope: Fortalecemento di e esfuersonan di conservacion di manta ray

by Admin
0 comment 175 views

 

E mantanan ray ta criaturanan masha carismatico cu ta biba den e awanan di Caribe Hulandes. Ademas di ta un hayazgo masha aprecia pa e buceadonan y hende cu ta snorkel, nan ta importante tambe pa salud di e oceanonan, ya cu nan por yuda na controla plankton y recicla e nutrientenan. E mantanan ray ta wordo menasa pa un variedad di actividad humano. Afortunadamente, nan lo considera un miho proteccion pa e mantanan oceanico gigante den region di Caribe den e proximo reunion di Conferencia di e Partidonan pa e Convencion di Cartagena (COPS) na final di e aña aki na Aruba.

Manta ray den Caribe

Caribe ta e hogar di dos especie di manta, e manta ray oceanico gigante (Mobula birostris) y e manta ray Caribense (Mobula cf. Birostris-, cu masha probablemente lo wordo describi oficialmente den e proximo añanan), mescos tambe varios especie di manta diablo. Manta ray ta e tipo mas grandi di raya. Nan no ta representa ningun peliger pa hende.

Manta ray ta alimenta nan mes door di filtracion, nan ta absorba alimento microscopico (plankton), incluyendo larva di pisca, krill, cabaron y cangreu planctonico di e columna di awa y ta filtra esaki a traves di nan plachinan di caicay. Nan ta hunga un rol hopi importante den mantencion di salud di e oceanonan mediante regulacion di e nivelnan di plankton. Ademas, door di move entre e superficienan di oceano, e profundidadnan di lama y e rifnan di coral, nan ta crea un conexion ecologico valioso mediante transporte di nutriente.

Menasanan

E mantanan ray ta wordo menasa pa un variedad di actividad humano. Un di e mayor menasanan pa e criaturanan den henter mundo ta sobrepesca, ya cu hopi biaha nan ta e obhetivo pa mitibo di nan plachinan di caicay, cu ta wordo uza den medicina chino tradicional. Tambe ta den riesgo di captura incidental, enredo, destruccion di habitat y contaminacion. Captura incidental y enredo ta probablemente e dos menasanan mas grandi den Caribe.

E mantanan ray ta e especie mas grandi di raya, nan ta biba largo (30-50 aña) y ta pocopoco den reproduccion di nan mes. E edad den cua e mantanan gigante por reproduci nan mes pa prome biaha ta calcula alrededor di 9-12 aña y e mantanan ta duna luz solamente na un cria cada biaha. E ciclo di bida lento y e velocidad abou di reproduccion ta haci cu e mantanan ta extremadamente vulnerabel na agotamento.

Speransa den horizonte

Den Caribe Hulandes  e areanan marina proteha, manera Yarari Marine Mammal and Shark Sanctuary, ta yuda proteha e mantanan y e mantanan diablo. Bo ta haya e especienan tambe den varios lista regional y internacional, manera Convention on International Trade in Endangered Species (CITES), Convention on the Conservation of Migratory Species of Wild Animals (CMS) y International Shark Strategy adopta pa Gobierno Hulandes (2019)

Ademas Reino di e Paisnan Hulandes hunto cu Republica di Francia a presenta formalmente un proposicion pa inclui e manta gigante den e Anexo II di Specially Protected Areas and Wildlife (SPAW) Protocol, un acuerdo regional pa proteccion y uzo sostenibel di Biodiversidad di costa y marino den Region di Gran Caribe. Si esaki keda aproba durante e proxima Conferencia di e Partinan pa e Convencion di Cartagena (COPS) IGM20/COP17 e aña aki na Aruba, e medida aki lo proporciona un marco legal pa e nivel mas halto di proteccion pa conservacion di e manta ray gigante.

Raporta bo observacionnan

Door di manda bo observacionnan (bieu y nobo) di manta ray (y diablo), por yuda e investigadonan y conservacionistanan pa siña mas y proteha miho e especienan aki. Por informa bo observacionnan a traves di Caribbean Islands Manta Conservation Program of Observation.org y e aplicacion gratis asocia ObsIdentify, cu lo yuda identifica e especienan cu bo a download nan potret  automaticamente. Ademas, tambe por manda potret a traves di Mantatrust.org/IDtheManta, correo electronico ([email protected]) of a traves di e pagina di rednan social di Programa di Conservacion di Manta di e Islanan di Caribe riba Facebook y Instagram. Si bo upload imagen riba e rednan social, particularmente riba Instagram, tag e ora @Caribbeanislandsmanta den bo uploadnan pa sigura cu e imagennan aki por wordo haya facilmente y ta wordo inclui den e base di dato global.

DCNA

The Dutch Caribbean Nature Alliance (DCNA)pa Naturalesa ta sostene comunicacion cientifico y  divulgacion den region di Caribe Hulandes door di haci cu e informacion cientifico relaciona cu naturalesa ta mas disponibel a traves di entre otro, Dutch Caribbean Biodiversity Database, e plataforma di noticia BioNews di DCNA y prensa. E articulo aki ta contene e resultadonan di varios estudio cientifico, pero e estudionan riba nan mes no ta estudio di DCNA. No tin derecho pa saca nada di e contenido. DCNA no ta responsabel pa e contenido y e impactonan indirecto cu resulta di e publicacion di e articulo aki.

************************************************************************************

Pa por haya mas informacion, tuma contacto cu [email protected]

Portret: Oceanic Manta Ray in Aruba. Credito di e potret: Danielle de Kool  

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio