Home » Parlamentario mr. drs. Arthur Dowers: Gobierno kier sconde pa su responsabilidad bisando mentira

Parlamentario mr. drs. Arthur Dowers: Gobierno kier sconde pa su responsabilidad bisando mentira

by Admin
0 comment 101 views

 

Den un declaracion duna diamars mainta, parlamentario di AVP, Arthur Dowers a comenta cu lamentablemente e reunion cu su fraccion a pidi ocho luna pasa y finalmente a tuma luga dialuna ultimo, tabata solamente un oportunidad pa henter e Gabinete Wever-Croes II bin grita y zundra. Ta hopi cla cua ta e wega cu gobierno ta hunga, esta di para ariba cu ta un fabor grandi nan a haci pa pueblo door di baha tres cen for di e tarifa di coriente, mientras cu e realidad ta cu no lo conoce un rebaho mas te na 2027 ora cu WEB a caba di cumpli cu tur su compromiso.
Loke Parlamentario Dowers ta haya hopi lamentabel ta cu e gobierno aki ta purba tira culpa riba tur hende, hasta riba un Spartaco Ghini, cu 30 aña pasa a cuminsa un proyecto di hotel na Aruba, na luga di asumi nan responsabilidad di pakico prijs di awa y coriente a subi asina drasticamente. Te hasta a tribi di bisa cu e prijs aworaki ta mas barata cu tempo nan a tuma mando. “Bo no por tuma pueblo haci di e estado akinan,”asina Dowers a expresa.
Realidad di bida ta cu e mandatarionan actual a mete den maneho di WEB Aruba N.V. door di nombra nan famia y compinchi pa maneha e compania y door di a nenga di hedge pa mantene prijs abou ora cu e gerentenan anterior di e compania a conseha nan pa haci esey. Como consecuencia, e compania producto di awa y coriente a perde 111 miyon florin cu awo ta for di pueblo tin cu sac’e bek pasobra ministernan no ta bay busca otro manera. Dowers: “Nos tur tin cu paga pa percura cu e hendenan aki por sigui cu e fiesta cu nan ta haciendo.”
Riba dje e ministernan ta bin parlamento pa gaña e ciudadano y ta p’esey oposicion ta bin dilanti pa bisa e berdad cu ta te na 2027 lo por baha prijs di awa y coriente. “Nan sa masha bon y e informacion cu nos ta haya, nan tambe ta haya. Boso sa masha bon e realidad y e situacion cu a hinca nos aden,” segun Dowers a declara na prensa.
Segun e parlamentario, costo di bida, prijs di awa y coriente tin impacto no solamente riba esun cu ta pag’e, pero e tin impacto tambe indirecto pasobra comerciante tambe tin cu page, kier men e tin cu calcul’e den su prijs. No ta solamente AVP ta keha y pidi pa gobierno pa responsabilisa su mes, pero sindicato y gremio ta kehando y hasta organisacionnan social manera esun di hende grandi ta sali afo y bisa cu loke ta pasando ta inaceptabel e insoportabel pa nos hendenan.
Gobierno a subi tur prijs na pais Aruba y di otro banda ta duna un compensacion di apenas 45 florin na hende grandi pa despues bay eyfo y bati na pecho pretendiendo cu ta gran cos nan a haci. E comerciante ta bisa cu esey no ta berdad y e pensionado mes ta bisa cu e compensacion no ta suficiente.
Esaki ta pone cu mester tuma paso mas drastico, segun e parlamentario, y e paso ey ta pa para e fiesta di friends and family, para e auto caro cu nan ta uza y reduci e cantidad di minister di 8 pa 7 pasobra tin minister aworaki cu tin cartera mas chikito cu di un director di departamento. Esey simplemente no por continua pasobra ta malgasta placa di pueblo. Fuera d esey tin e remedi cu nos grandi mes tin cu paga.
Mirando cu no ta tuma na serio e reunion cu pidi y ta sigui purba gaña pueblo, e unico solucion cu ta resta ta pa pueblo subi caya y exigi e reduccion cu e pueblo ta haya cu e merece. Asina, Dowers a finalisa bisando.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio