Home » Parlamentario di AVP, Mike Eman: Cada paso di e gobierno aki ta empeora e situacion di pobresa

Parlamentario di AVP, Mike Eman: Cada paso di e gobierno aki ta empeora e situacion di pobresa

by Admin
0 comment 112 views

 

Den su disertacion dialuna mainta durante e reunion publico cu finalmente Parlamento di Aruba a yama riba peticion di fraccion AVP pa atende e topico di aumento drastico di costo di bida, lider di Partido di Pueblo Arubano (AVP) Mike Eman a bisa cu e balor real di un sociedad por midie solamente den e manera con e ta trata su miembronan di mas vulnerabel y Gabinete Wever Croes II no ta cumpliendo cu su responsabilidad.
Teniendo na cuenta cu Aruba tin 22 mil pensionado, di cual solamente 3 pa 4 mil tin un pension adicional, bo ta saca afo cu e gran mayoria, esta 18 mil ta depende solamente riba nan pension di AOV; un pension cu no ta yega na e suma minimo necesario pa biba segun Centraal Bureau Statistiek (CBS) y pio ainda pa tur esunnan cu no ta hay’e completo. Mientras cu tin mester di 2.528 Florin pa por biba, hopi pensionado ta haya 600 Florin of un maximo di 1.400 Florin.
Eman ta puntra cu ki consenshi Gabinete Wever-Croes II por dirigi e pais aki si sabiendo cu eyfo tin mas di 50 mil persona cu, na e momentonan aki, no por cumpli cu e necesidadnan di mas basico. “E entrada no ta suficiente pa cubri pa nan por tin un bida humilde; ni sikiera un bida ni grandi, pero djis un bida cu a lo menos ta duna nan trankilidad pa por cria nan famia,” asina e parlamentario a enfatisa indicando cu casi mita di e sociedad, entre esunnan cu bijstand, pension y salario minimo, ta bibando den un pobresa emergente y gobierno no ta haciendo algo pa purba trece alivio.
Al contrario, cada paso cu e Gabinete Wever-Croes II ta tuma ta empeora e situacion. Cu introduccion den algun siman di e BBO di 7% na frontera, fruta, berdura, carni y galiña cu na e momento aki ta 0%, ta bay paga 7% na frontera. Impuesto ta bisa cu e comerciante por deduci bek despues, pero un bes cu ta hinca den e prijs, no ta conoce rebaho. P’esey, tempo cu Eman tabata prome minister, a bin cu reparatietoeslag, pa alivia e peso di BBO. “Awo e peso di BBO den 3 schakel cu na momento aki ta aumenta na 21%, ora bo bay pone e 7% na frontera, algo di esey ta bay keda na e prijs tambe. Probablemente ta hiba nos na un peso di BBO di 24%”
E parlamentario a laga bon cla cu e cifranan ey no ta djis argumento politico. Departamento di Impuesto a bisa den Parlamento cu nan ta calcula di lo ricibi un suma di 40 miyon adicional den caha di gobierno y segun Eman a expresa: “Un hende lo bay pag’e. Pa bo haya 40 miyon florin extra, un hende ta bay paga e BBO ey.”

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio