Home » Aruba Bank ta sostene Respaldo

Aruba Bank ta sostene Respaldo

by Admin
0 comment 184 views

Oranjestad- Aruba Bank a anuncia su Walk & Run 2023 cu lo tuma lugar dia 22, 23, 24 y 25 di mei proximo y a nombra Respaldo como e fundacion cu e evento aki lo sostene. Un parti di e pago di registracion di e participantenan di Walk & Run lo bai pa Respaldo.

Respaldo ta un fundacion specialisa cu a ser funda pa duna tratamento den caso di trastorno compleho y problema psiquico. Respaldo ta traha segun e conocimento cientifico mas moderno y recientemente tabata someti na un evaluacion di e asociacion di psiquiatria for di Hulanda.

Respaldo tin un clinica, loke antes tabata PAAZ unda hende cu ta hopi afecta por a keda pa un tempo cortico. Banda di e clinica, Respaldo tin un Policlinica pa mucha y hoben y uno pa Adulto. Na ambos policlinica nan tin psiquiatra, psicologo specialisa den cuido di salud, trahado social y enfermeronan cu hopi experiencia y bon capacita.   Ta aplica diferente tipo di tratamento special pa tanto mucha como hoben, y adulto. Ta percura regularmente pa extra training y educacion necesario cual ta nifica cu profesionalnan di Respaldo ta certifica na nivel halto.   Tin tambe un team specialisa cu yama  FACT-team cu ta guia hende cu ta hopi malo na nan propio cas.

E presion riba Respaldo a bira mas grandi desde e pandemia pasobra tratamentonan no por a tuma lugar na tempo y door di esaki  e trastornonan tabata bira mas complica y nan mester di mas tempo pa sana. Adolescente pa basta tempo no tabatin berdadero contacto social, mientras tanto a bira mas adicto na entre otro ‘social media’ y a despista mas ainda. Anciano tabata extra solitario y tabata bira mas depresivo. Pa motibo di Covid pobreza a crece mas ainda y ta crea un presion economico. Di e forma aki angustia y depresion ta keda aumenta. Durante y despues di Covid e tendencia di suicidio bao di e poblacion a aumenta. E tendencia di suicidio ta pertenece na un fundacion specialisa cu den nos caso ta Respaldo y ta costa hopi tempo pa trata esey bon. Pero tin demasiado poco profesional pa por aborda e trabao aki suficientemente.

“E Pandemia tawata tin un impacto inmenso den nos sociedad, y mas aun pa e personanan cu ta bringa cu problema mental” Els Avontuur, Managing Director di Aruba Bank ta bisa. “Nos ta reconoce e importancia di e servicio di salud mental den nos comunidad, y nos ta orguyoso di sostene Respaldo den nan esfuerzo pa duna sosten na tur esnan cu tin mester”.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio