Home » Hendrik Tevreden (MEP): No tarda mas pa duna sector di cuido nan 5.5%

Hendrik Tevreden (MEP): No tarda mas pa duna sector di cuido nan 5.5%

by Admin
0 comment 79 views

 

Desde juni 2020 AZV a introduci e 5-wave model pa asina evita cu gastonan di salubridad ta keda subi y kibra e fondo di aseguro local creando un problema aun mas grandi pa e aseguradonan. Ta conoci cu e peso di gasto pa loke ta trata cuido na Aruba ta halto y mester remedia esaki mas liher posibel.

Ora gobierno a anuncia cu lo tuma pasonan pa atende cu e problema aki a causa hopi tension bou di e sector di cuido y no tawata un decision facil pa tuma pa gobierno. Diferente intento y ideanan a wordo presenta y al final a scoge e 5-wave model. Ta bon pa añadi cu Covid-19 a bini cu mas gasto ainda acerca y di cual a mara Aruba tambe na mas reforma atraves di Landspakket cu Hulanda. Pero, mientras na Aruba a corta y baha den salario di esnan den cuido, na Hulanda y Boneiro nos a mira cu netamente esnan cu ta labora den cuido a bay dilanti den nan salario y beneficionan. For di parlamento hopi bes mi a indica cu kier mira esaki tambe pa nos dunandornan di cuido aki na Aruba. Pesey, laga mas pronto posibel AZV duna bek e 5.5% cu a wordo corta den salario bek na tur esnan cu ta labora den cuido.

For di parlamento lo keda insisti
Den tur reunionnan di IPKO cu mi a asisti, den reunionnan cu Eerste Kamer aki na Aruba y tambe den reunion cu secretario di Estado sra. Van Huffelen aki den parlamento na Aruba, mi a keda insisti cu e recorte di 60 miyon tin di para. E a tuma hopi insistencia pa haci e Hulandesnan comprende cu e medida aki mester wordo cambia. E miembronan di sector di cuido mes tambe a emiti un carta na januari 2023. Mayoria di e asociacionnan o fundacionnan, pero tambe sindicato y e trahadonan di hospital ta splica den e carta, cu a yega tanto na parlamento, su Excelencia Gobernador di Aruba, AZV y minister en cuestion, cu nan kier pa trek in e recorte di 5.5% riba nan budget. Januari 2023 tur salario di ambtenaarnan a bay bek na normal. Tur ambtsdrager a bay na normal y ta hustifica cu pa tur dunador di cuido bay bek na normal di e 5.5% cu a wordo corta den nan salario. Pesey mi ta insisti pa minister di salubridad sigui intermedia na AZV y elimina e medida aki y entrega 5.5% na e sector di cuido.

Gradicimento pa solidaridad
Segun AZV e gastonan a bira mas manehabel awor, y lo por duna bek e 5.5%. Mi lo desea pa e ta e luna cu ta sigui aki mes. Nan tin un overschot, y na mi opinion esaki tin di wordo inverti bek den cuido, pero riba tur cos, na nos profesionalnan cual ta digno di nan salario completo. E ultimo dos aña y mey e sector di cuido a mustra cu nan ta solidario cu Aruba. Solidario cu nan pashentnan y a cumpli cu e yamada sagrado di duna cuido na henter Aruba sin excepcion. Esaki ta algo cu ta wordo aprecia y balora. Pasobra ora cu tur hende tawata den cas, nan tawata na trabou, ora cu tur hende tawata sosega paden, nan tawata den e campo di bataya contra e virus di Covid-19. Nos ta y lo keda eternamente agradecido pa nan dedicacion, pasion y profesionalismo.

Mi peticion ta pa no warda mas luna pasa. E momento ta awor pa duna bek tur loke e dunadornan di cuido tin derecho riba dje. Pesey desde aki e yamada na AZV y su staff, na Gobierno di Aruba, especialmente na nos Minister di Salubridad pa elimina e recorte di 5.5% di sector di cuido y pa no tarda mas. Esaki den nomber di tur dunadornan di cuido na Aruba.

 

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio