ORANJESTAD: Recientemente, Minister Endy Croes hunto cu Sr. Isnardo Faro di Ministerio di Deporte a reuni cu Sr. Alwyn Lin. Durante e encuentro a trata diferente proyecto cu ta planifica pa ehecuta den aña 2024. Sr. Lin tabata encarga cu e parti financiero di e proyecto pa edificio nobo pa Juliana School y Ceque College. Dia 1 di maart ultimo, a entrega e rapport final na DEZHI.
Hunto cu un ekipo di arkitecto a reuni cu Juliana School y Ceque College, unda a traha diferente plan. A elabora e plannan den un rapport. Minister Endy Croes a enfatisa cu ta trata di un bunita proyecto, unda cu desde aña 2024 por cuminsa traha (un) 1 of (dos) 2 scol nobo.
Concluyendo, Mandatario di Enseñansa a indica cu e tabata un bon reunion, hopi informativo pa concretisa e rapport cu a entrega na DEZHI. Pa asina a traves di cifra, haci e proyecto factibel y atractivo pa tin oportunidad di wordo scogi den e ronda cu lo tin aki 1 luna. Minister Endy Croes a expresa cu ohala por ricibi bon noticia prome cu mita di aña cu e 2 scolnan aki ta riba agenda pa por cuminsa cu construccion den aña 2024.