Dia 27 di September 2022 minister Glenbert Croes, den calidad di minister di Energia, a vocifera cu tin un investigacion forensico ta andando na WEB Aruba NV. Den un articulo den Solo Di Pueblo, e mandatario a bisa cu den un proyecto di instala motornan Watzilla, tin gastonan excesivamente halto a tuma lugar. Tin un suma di 70 miyon florin di ‘meerwerk’ cu a presenta. E mandario a enfatisa cu e 70 miyon no ta costo di e proyecto, sino e 70 miyon ta solamente trabaonan adicional cu den mundo di construccion ta conoci como ‘meerwerk’. Sigur mirando e suma gigante aki, solamente por conclui cu esaki ta algo cu hamas y nunca por wordo tolera.
Considerando cu 70 miyon florin ta ekivalente na e costo completo di e proyecto termina di Secrets Hotel na Colony, pueblo ta haya e impresion con e suma aki a wordo malgasta den un forma cu ainda pueblo ta wardando contesta riba dje. Mirando cu ya caba mas cu 6 luna a pasa ta bon pa pueblo haya un update riba e asunto aki. Lo ta bon pa Minister Glenbert Croes sali splica un poco con leu e investigacion forensico aki ta y kico a bin constata te cu awor.
Preguntanan cu mester wordo contesta
- Si ta constata irregularidad den e caso di meerwerk di 70 miyon florin aki, esnan responsabel lo wordo confronta cu e consecuencianan legal?
- Kendenan a aproba e sumanan gigantesco di e meerwerk aki?
- Con por ta posibel cu e suma por a yega 70 miyon florin di meerwerk sin cu a trek aan de bel? Ta placa di pueblo cu sigur den e tempo aki lo por a wordo usa pa inversionan clave.
- Gerencia y Internal Audit di WEB no tabata tin un suma maximum estableci pa e meerwerk aki no sali for di proporcion?
- Kende a haci e control riba e trabao y gasto di e meerwerk aki?
- For di ki tempo e gastonan relaciona cu e meerwerk aki a cuminsa core na WEB Aruba NV? Ainda e suma di e meerwerk aki ta creciendo of a pone un stop na dje caba?
- Mirando cu WEB a subi prijs di awa cu coriente pasobra a perde “reservanan” financiero ora a absorba e gasto di aumento di petroleo. Con e 70 miyon aki a impacta WEB economicamente?
- Mirando cu pais Aruba mester haya dividend di e compania di WEB, a usa e meerwerk aki pa baha ganashi y e contribucion di WEB na gobierno di Aruba?
- Ken lo para responsabel pa e Flying Wheel cu nunca a wordo termina y cu probablemente nunca lo funciona?
Esakinan ta algun di e preguntanan cu pueblo mester wordo informa riba dje urgentemente, ya cu nos ta papiando aki di un compania estatal crucial, di cual pueblo ta su doño. Pueblo tin e derecho pa haya sa di ki forma esaki ta wordo maneha y con su entrada miyonario ta wordo administra.
Si pueblo desea mas informacion di e articulo aki, contact mi na tel: 528-4639 of email mi na: [email protected] / Bo parlamentario y sirbidor di pueblo na bo ordo semper!