ORANJESTAD – Recientemente Centraal Bureau Statistiek (CBS) a tene dos seminario. Uno pa duna informacion tocante di demografia (cantidad di persona, sexo, edad, region cu ta biba etc.) y un otro riba informacion economico. A traves di e seminarionan aki, CBS kier mustra tur e data cu nan ta disponi di dje cu nan a acumula a traves di Censo y encuestanan cu nan a haci, pa pone nan na disponibilidad di usuarionan di Aruba.
E meta di e seminarionan ta pa usuarionan cera conoci cu e tipo di informacion cu CBS tin. Ademas e seminario tabata dirigi tambe pa CBS scucha di usuarionan ki informacion mas nan desea y pa CBS mira si por suministra esey.
Prome Minister Wever – Croes a comparti cu prome cu e tabata den gobierno, esta prome cu aña 2003, na mester a tuma decisionnan riba cambio di ley di impuesto sin cu tabatin informacion disponibel pa haci calculacion exacto di kico e conseciencianan ta di e cambionan di ley y cambionan di maneho. Aworaki cu informacion y experticio di CBS, tin datonan hopi mas actual, confiabel y hopi lihe.
Prome Minister a felicita CBS cu e iniciativa aki y ta gradici tur esnan cu a haci e dos seminarionan aki un exito.
