Home » MINISTER DI CULTURA A CELEBRA DIA MUNDIAL DI TEATRO NA CAS DI CULTURA

MINISTER DI CULTURA A CELEBRA DIA MUNDIAL DI TEATRO NA CAS DI CULTURA

by Admin
0 comment 196 views

 

A reconoce Burny Every den feliz memoria y Norman de Palm durante e anochi aki

Dialuna cu a pasa tabata Dia Mundial di Teatro. Un dia cu ta para keto na kico teatro ta significa pa nos cultura y pais, y un dia di celebracion pa tur esnan cu ta forma parti di e gremio teatral. Riba e dia special aki a celebra e poder unico cu teatro tin pa inspira, entretene y uni varios hende di diferente cultura. Rond mundo tur artistanan den gremio di teatro ta bini hunto riba e dia special aki cu e meta pa crea conscientisacion di e importancia cu teatro tin den bida di cada cuidadano y nan comunidad.

E tema di e aña aki proclama pa UNESCO ta ‘Teatro y un Cultura di Paz’. Esaki ta mustra e importancia di, atraves di teatro, por promove paz y harmonia den un comunidad di diferente cultura rond mundo. E actriz di Egipto sra. Samiha Ayoub a trece un bunita mensahe pa e dia Mundial di Teatro. E esencia di sra. Ayoub su mensahe ta, cu mirando cu mundialmente nos ta bibando den conflicto, guerra y calamidad, nos ta experenciando instabilidad. E instabilidad aki tin consecuencia riba nos estado material, spiritual y psicologico, pero teatro ta un forma creativo y poderoso cu ta laga tur duda y preocupacion disparce.

‘Den e contexto aki na Aruba, nos por mira cu a pesar di nos retonan, nos Pais tambe ta bendiciona di por tin un tarima unda cu nos artistanan por crea obranan cu ta duna bida y laga preocupacionnan disparce. E arte di teatro tin un balor grandi den historia cultural y artistico aki na Aruba, ya cu durante años ela sirbi como un medio di comunicacion, expresion y entretenimiento. Nos ta un pais chikito, pero rico na talento, arte y herencia cultural.’ Minister Maduro a expresa. Durante e anochi aki, y manera a bira custumber, a duna reconocemento na dos persona cu a dedica nan bida na e forma di arte aki y a contribui na e desaroyo di teatro na Aruba. E brinda un homenahe postumo na sra. Bernadina (Burny) Elizabeth Every, y tambe a otorga e Premio Nacional di Teatro na e conocido sr. Norman de Palm. Dos persona cu hopi amor, pasion, y cu trabou duro a sa di haci un excelente trabou cu a pone nan sobresali den e arte di teatro.

Bernadina (Burny) Every
Sra. Burny Every den feliz memoria a nace na Aruba y ta yiu mayor di sr. Clarence Every y sra. Carmen Paulina Harms. E ta e prome Arubiano profesional riba e tereno di teatro, e prome actriz y e prome persona cu a traha un cine Arubiano, un baluarte riba tereno di teatro cu reconocimento internacional. Sra. Burny tabatin varios talento, e tabata actriz y tambe poeta. Den bida diario su funcion tabata maestra di scol y docente di expresion dramatico. Tambe ela traduci varios obra teatral internacional y a guia, dirigi y produci varios obra teatral local. Sra.

Burny ta conoci pa su obranan riba nivel halto y inovativo cu menshenan critico, ela revoluciona e e mundo teatral na Aruba. Na aña 2006 nos Ser Supremo a tum’e den su reino celestial.

Norman de Palm
Sr. Norman de Palm, e conocido cinematografo, artista, escritor, actor y productor di cine manera Desiree, Almacita di desolato, y Ava y Gabriel- un historia di amor. Sr. De Palm a nace na Aruba y cu su 9 aña ela muda hunto cu su famia y a bay biba na Corsou. Sr. De Palm a traha varios produccion cu sr. Felix de Rooy y nan produccionan a gana varios premio internacional. Sr. De Palm ta promove e intercambionan di artistanan entre e islanan pa asina engrandece e lasonan cultural y social. Ela produci varios obra teatral conhuntamente cu Departamento di Cultura di Aruba. Tambe sr De Palm ta activo den e intercambio cu e hobennan di Aruba y Corsou cu e programa di Arte di Palabra y Gang di Arte.
Su deseo ta pa estrecha mas e frontera y brinda mas oportunidad na e artistanan cu beneficio pa ambos banda. Nos ta gradici Sr. Norman de Palm pa e tremendo iniciativa di intercambio riba e tereno teatral y cultural. Masha danki pa brinda mas hende e oportunidad pa tambe por biba Aruba su cultura.

‘Den nomber di Gobierno di Aruba, mi ta gradici tur artista den e mundo teatral, danki pa tur e amor, pasion, disciplina, esfuerso y perseverancia pa trece un bunita obra pa nos comunidad y asina contribui grandemente na e herencia cultural di nos Pais Aruba. Masha pabien riba boso dia special. Cultura, bo tin cu bib’e!’ tabata palabranan final di e mandatario durante e anochi aki.

Minister Maduro ta gradici UNESCO Aruba, Departamento di Cultura, gremio teatral na Aruba y tur cu a contribui na e bunita obranan cu a ser presenta riba e tarima di nos Cas di Cultura.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio