Home » DMH ta encurasha mayor pa tur mucha tin su identidad pa facilita su integracion social

DMH ta encurasha mayor pa tur mucha tin su identidad pa facilita su integracion social

by Admin
0 comment 140 views

Relaciona cu Dia di Himno y Bandera, cu ta nos Dia Nacional, Departamento di Mucha y Hoben (DMH) ta para keto un rato, riba kico ta nifica identidad nacional pa nos muchanan. Identidad di nacionalidad ta dificil pa defini, ya cu e ta conecta cu otro concepto tambe manera; etnicidad, nacionalidad y nacionalismo, pues e por nifica algo diferente pa cada persona. Den Tratado Internacional di Derecho di Mucha tin dos articulo fundamental: Articulo 7 y Articulo 8. 

Articulo 7 Derecho pa tin un documento identificativo

Desde su nacemento, e mucha tin derecho pa adkiri un nomber, fam y nacionalidad. Tin dos tipo di circumstancia cu e mucha por adkiri su nacionalidad: 

  • Nacionalidad original of di sanger: e mucha ta rekeri su nacionalidad di su mayornan desde e momento cu e nace. 
  • Nacionalidad door di residencia: aunke su mayornan tin otro nacionalidad, e mucha ta adkiri e nacionalidad di e teritorio cu el a nace. 

Ta haya e nacionalidad na momento cu registra na Registro Civil. Ta bon pa accentua cu e mayornan cu no ta naci na Aruba, pero ta biba akinan, mester tin permiso valido pa por inscribi nan yiunan cu nace na Aruba. Esaki ta un elemento hopi importante, ya cu na prome lugar, e ta defini e vinculo entre e persona y e ciudadania y na di dos lugar, ta constitui e pertenencia di un persona y ta establece e calidad di un persona y su posicion huridico, cu ta unie na e poblacion di un pais. 

Kico ta pasa cu un mucha cu no tin documento cu ta identific’e?

Un mucha cu no ta conta cu un documento di identificacion, ta core risico di keda den un situacion di exclusion social, unda e no lo por tin acceso na e servicionan fundamental manera; educacion, atencion y siguridad social y medico. Den varios caso, e mayornan ta percura pa tin un seguro apart, unda cu e mucha por haya e servicionan fundamental, pero no tur biaha esaki ta e caso. Ta importante y fundamental pa mayor ta na altura y asumi responsabilidad pa su yiu tin un identificacion valido. 

Articulo 8 derecho pa tin proteccion di e mucha su identidad

Tur pais mester respeta un mucha su identidad. Mester yuda e mucha pa preserva su nomber, su fam, su nacionalidad y e relacion cu su mayornan. Den caso cu un mucha ta priva di su identidad, e pais mester protega y yuda e mucha pa recupera esaki, mas pronto cu ta posibel. 

Ken ta Arubiano?

Un pregunta cu hopi biaha nos ta haya nos mes confronta cu ne y un mucha no ta un excepcion, na momento cu bo puntr’e: Abo ta Arubiano? Varios di e contestanan cu nan ta duna, ta depende di e situacion di nan mayornan. Un mucha ta identifica famia, lugar di nacemento y residencia como factor fundamental pa determina nan propio sentimento di nan identidad nacional. Hopi biaha e muchanan ta pinta e perspectivanan stereotipico di nos identidadnan nacional; cas estilo bieu den color geel, Hooiberg, beach, mata di aloe, etc. Pero loke nos kier pa nos muchanan identifica nan mes tambe como un Arubiano ta; custumber, creencia, principio, norma y balor, cu ta fundamental pa desaroyo optimal y saludabel di un mucha y su identidad nacional. E mayornan, scol, deporte y media ta influencia masha hopi mes den formacion di e percepcion di nos muchanan como ciudadano Arubiano, unda nan por reconoce nan mes, como miembro fundamental di e sociedad y di cual nan tin un serie di derecho y obligacion como ciudadano. P’esey ta importante pa nos celebra e Dia di Himno y Bandera cu nos muchanan y asina sigui fomenta e amor, respet y balor propio pa pais Aruba, pero tambe nan identidad Arubiano. 

 

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio