Riba 13 di maart 2023 mr.dr. Jayburtt Dijkhoff a duna un charla den Aula di Universidad di Aruba. E evento aki a wordo organisa pa Fundacion SIKI y tabata den conexion cu e lansamento di e buki titula ‘E derechonan di pashent’. Ta trata un evento historico como cu ta e prome buki den Reino Hulandes cu a wordo scirbi pa pashent y door di un experto riba e tema aki.
Durante e charla Dijkhoff a subraya e necesidad pa pashentnan sa kico ta nan derecho y pa haci uzo di nan derecho tambe. Sinembargo, el a presenta detayadamente cu tin hopi trabou pa haci. Banda di e proteccion di pashent, e sistema di cuido tambe ta bringa pa atencion di gobierno. E ta keda un trabou continuo pa haya un balansa entre e dos forsnan ey. Dijkhoff a enfatisa cu e derechonan di pashent mester wordo amplia y tin varios ley y derechonan cu falta. El a duna varios ehempel di esakinan, entre otro cu mester traha mas riba e sistema di cuido, e derecho di entrega keho, y prevencion. Tambe a toca e tema di bureaucracia cu ta stroba procesonan di ley tuma lugar di un manera adecuado. Esey a stroba pa logra derechonan riba salud publico y asta salud na pia di trabou (ARBO).
Por ultimo, Dijkhoff a indica cu e trabou ta encera cu awor mester start un campaña di conscientisacion. Mas tanto persona na Aruba mester haya sa kico ta nan derecho di pashent. Lo duna mas charla pa diferente grupo. Tambe lo sigui cu e Plataforma Pashentnan di Aruba (PdA) cu lo ta e prome representacion di pashentnan den nos comunidad. E plataforma lo presenta nan presidente cu lo tuma asiento den e Hunta di Calidad y asina sali na defensa di e interesnan di pashent den tur regla nobo riba nivel nacional.
E charla a resulta di ta un exito grandi. Tur presente a haya hopi informacion y mayoria a logra obtene un buki. Un danki ta bai na Universidad di Aruba y ‘Center for Lifelong Learning’ (CLL) pa e facilidad. mr.dr. Jayburtt Dijkhoff a gradici tur presente y ta haci un yamada na pueblo di Aruba y e sector di cuido pa haya sa kico e derechonan di pashent ta encera. E buki ta obtenibel na tur boekhandel na Aruba.
Keda pendiente e proximo simannan aki pa diferente charlanan, cu lo ta completamente gratis pa pueblo di Aruba. Esaki lo wordo anuncia den media y tambe riba e red social di SIKI Aruba.
