Como ex minister di enseñanza y actual parlamentario pa Partido di Pueblo Arubano (AVP), mr. Arthur Dowers a sintie personalmente yama pa lanta y para contra e abuso cu Gabinete Wever-Croes II ta cometiendo, un biaha mas, contra e pueblo di Aruba. Para pafo di edificio di Stichting Katholieke Onderwijs Aruba (SKOA), Dowers a denuncia e abuso cu kier comete pa medio di un aumento drastico den e tarifa di schoolgeld.
A cuminsa lagando medionan di comunicacion scucha un grabacion di e actual Prome Minister, tempo cu e tabata den oposicion, caminda el a pretende di demostra compasion pa e mayornan cu mester paga schoolgeld door di priminti cu, si e ta den gobierno, lo elimina esaki. Cinco aña mas laat, nada di esey a tuma luga y mas bien e situacion ta empeora cu su bendicion. Dowers a califica esaki como e tipico politica barata di MEP. “Awe nos ta den e realidad cu Evelyn Wever Croes ta bay bati e pueblo cu medida atrobe.”
E anuncio di e siman aki di parti di SKOA ta representa e aumento di mas grandi den historia di schoolgeld na Aruba. Loke ta mas tristo, segun e parlamentario, ta cu Wever-Croes ta e gobernante cu, despues cu su primo a keda sentencia pa corupcion, kita for di trabou y obliga di paga bek loke el a horta, a dun’e trabou bek den un departamento cu ta cay bou di dje y awendia e primo ey ta gana 10 mil florin pa luna di Pais Aruba.
Tempo cu tabata den oposicion a argumenta na gobierno cu ta djis 2.5 miyon mester duna SKOA y por haya esaki door di no biaha y fiesta, pero awendia e ministernan di Gabinete Wever-Croes II ta na tur continente biahando rond mundo mientras ta castiga pueblo cu tur sorto di medida. Y e unico argumento cu esunnan di MEP por a pensa pa defende e maltrato aki ta pa bisa cu creche ta costa mas cu scol.
“E cos aki ta un abuso y un inhusticia masha grandi,” Dowers a declara argumentando cu no por ta posibel cu bo a priminti e pueblo aki 2.5 miyon extra pa percura cu ningun hende ta paga pa schoolgeld. “Boso a horta placa for di criaturanan inocente di e pais aki y boso ta perhudicando nan,” el a culmina bisando.
FACEBOOK:
Aruba ta conoce e aumento di mas drastico den schoolgeld cu bendicion di Evelyn Wever-Croes.
INSTAGRAM:
Eliminacion di schoolgeld ta otro promesa falso for di e politica barata di MEP.