Diamars mainta pa 9:00am algun miembro di nos fraccion hunto cu Minister Endy Croes y Minister President Evelyn Wever-Croes a bay na scol St. Aloysius na Noord, pa mira y inspecciona e progreso di e trabaonan di renobacion. Mi a keda fascina cu e progreso di e trabaonan cu ya ta den un etapa basta avansa, considerando cu djis algun luna prome mi por a wak e condicion cu e scol ki tabata aden. E renobacion a bay profundo y por a determina cu un trabao professional y masha bunita ta haciendo cu e transformacion di e scol aki. E lokaalnan a keda masha bunita mes, cu pintura colorido y un banda cu tegelnan moderno. Tambe ta trahando bañonan nobo na full un otro lugar pa e alumnonan. Pa loke ta trata e lugar pa e maestronan tumanan pauze y haci reunionan ta completamente renoba tambe.
Adicionalmente, pa prome biaha den su historia St. Aloysius lo conta cu su propio Gymzaal completamente nobo y moderno. Aworaki apenas e fundeshi y vloer di esaki a wordo basha sinembargo pa Juni e gymzaal aki lo keda entrega. Tin basta trabao ainda andando riba lokaalnan, bañonan, structuranan y speelplaats cu mester tuma lugar. Sinembargo loke ta finalisando caba ta mustra e bon calidad, creatividad y bunitesa cu e scol aki lo bay ta ora e producto final ta keda cla. Mi ta sigur cu e muchanan di e districto di Noord lo keda maraviyosamente bon sirbi den e scol aki cu mester keda cla pa cuminsa funciona pa e aña escolar nobo 2023-2024. For di akinan alvast un pabien na tur docentenan y hoofd di scol di St. Aloysius. Tambe mi ta agradecido pa por wak con minister Endy Croes a tuma e reto pa preserva e arkitectura original di e scol, sin sacrifica e upgrade cu esaki tabata tin mester pa por educa y prepara nos alumnonan pa nan futuro.
Si pueblo desea mas informacion di e articulo aki, contact mi na tel: 528-4639 of email mi na: [email protected] / Bo parlamentario y sirbidor di pueblo na bo ordo semper!