E palabra ‘Peripateo’ ta tanto un palabra griego y hebreu y tin diferente definicion. Na griego e ta wordo defini como: cana, traha bo mesun caminda, progreso, pa haci debido uso di oportunidadnan. Na hebreu su definicionnan ta: pa biba, pa regula bo mesun bida.
Riba 9 di februari 1971, Movimiento Electoral di Pueblo (MEP) a keda funda door di Betico Croes den felis memoria na su propio cas. Te ainda MEP ta e unico partido politico democratico na Aruba cu democraticamente ta eligi su lider pa medio di su sostenedornan den forma di un congreso. Desde 1971 e ‘peripateo’ di MEP a cuminsa. Pa 52 aña largo MEP su vision y mision ta pa Aruba cana y traha nos mesun caminda di progreso, usando tur e oportunidadnan cu tin pa asina crea e bida cu nos mes ta desea.
E peripateo di MEP ta sigui te cu e dia di awe. MEP a uni e pueblo Arubano cu awe nos tur ta forma parti di dje. Durante cinco decada MEP a conoce 3 diferente lider, diferente candidato y diferente politico tanto den e funcion di minister of parlamentario. MEP a crea un union bou di habitantenan di Aruba cu a kere firmamente den e autonomia di nos pais. E pueblo Arubano cu a crea su mesun caminda durante e ultimo 37 añanan di nos Status Aparte.
MEP ta e vehiculo politico cu ta brinda tur ciudadano e oportunidad pa den union y comprendemento traha nos caminda, traha na nos progreso y crea e bida ideal cu nos ta desea.
Di e forma aki Aruba tin un Movimiento Electoral di Pueblo cu durante 52 aña a pone su mes na dispocicion di su pueblo pa e pueblo ta esun beneficioso.
Palabra di felicitacion na lider di Movimiento Electoral di Pueblo, na su ministernan, su parlamentarionan y candidatonan cu e empuhe cu nan ta duna na e partido prestigioso aki.