ORANJESTAD – Mayan mainta e trio homber J.R., G.O. y M.M. ta presenta dilanti Hues pa e caso penal cu Ministerio Publico a cuminsa contra nan. Ta asina cu ta ser papia di seis of mas persona cu tambe ta forma parti di falsificacion di pruebanan di vacuna di Covid.
ARUBANATIVE por a compronde cu nan tabata bende e pruebanan di vacuna na personanan cu no kier vacuna pero mester presenta na trabao cu prueba di vacuna sino nan ta core riesgo di wordo manda cas.
TA UN GRUPO TA ENVOLVI
E trio J.R., G.O. y M.M. ta wordo acusa cu den e periodo di 1 Maart 2021 te cu 14 December 2021, hunto cu seis o mas persona, a participa den un organizacion cu a falsifica e pruebanan di vacuna y/of a facilita pruebanan di vacuna contra reglanan, na personanan.
BENDE PRUEBANAN DI VACUNA
E trio ta wordo acusa cu den e periodo menciona, como empleado di Gobierno den funcion di un contratista na DVG, a tuma placa pa registra vacunanan y/of hinca informacion den e sistema di computacion di DVG, sabiendo cu e vacunanan no a sosode. A usa e informacion incorecto aki pa laga pasa cu personanan a haya vacuna siendo cu no ta asina.
POSECION DI COCAINA
Fiscal ta acusa J.R. di tabatin cocaina den su poder, dia 14 December 2021. Aparentemente esey tabata e dia cu el a wordo deteni y Polis a hay’e cu cocaina.
Por a compronde cu e sospechosonan J.R., G.O. y M.M. ta presenta den Corte pero cu e caso ta un “regie zitting”, esta cu Fiscal, abogado lo bay bisa Hues si kier pa mas investigacionnan tuma lugar. Despues Hues lo tuma un decision y tambe lo pone un fecha pa tratamento di e caso. No ta conoci ainda si e otro personanan tambe lo wordo persigui y si ta asina, si nan caso lo wordo trata separa cu e trio aki.