Cada inversion den formacion, ta un inversion den un miho servicio di Aduana pa nos comunidad
Minister Maduro tabata presente na e graduacion di 39 Aduanero cu a ricibi nan diploma despues di a sigui e estudio interno di ‘Hoofdkommies der Invoerrechten en Accijnzen’. E estudio aki cu normalmente tin un duracion di 2 aña, a wordo reduci na 1 aña pa motibo di e situacion post COVID-19. E biaha aki e estudio tabata mas enfoca riba practica na unda por a siña e trabou Aduanero via casonan realistico y relevante pa e funcion. Mester menciona cu esaki ta un cambio cu ta sostene e vision di modernisacion di e servicio cu Aduana ta ofrece na comunidad.
Minister Maduro a hiba palabra pa felicita tur Aduanero riba e dia special aki na unda nan esfuerso pa desaroya nan mes profesionalmente ta wordo celebra cu entrega di nan diploma. E mandatario ta contento cu Aruba por conta cu 39 Aduanero cu a kere den nan mesun potencial pa sigui crece den nan trabou atraves di e estudio aki. ‘Ta importante pa como persona y como profesional pa nos sigui desaroya nos mes, ya cu esaki ta contribui na un miho servicio di Aduana na nos comunidad. Cada inversion den formacion, ta un inversion den un miho servicio di Aduana na nos comunidad,’ tabata palabranan di Minister Maduro na e ocasion aki.
Minister Maduro ta felicita tur esnan cu a ricibi nan diploma y ta deseanan tur clase di exito den nan trabou na bienestar di nos Pais. Danki pa kere den boso mes, y danki pa kere den Aruba.
