ORANJESTAD: Diabierna ultimo Minister Endy Croes a bishita e “Museum Nacht meets a Taste of Christmas 2022” di Filomena College MAVO. Despues di dos aña e scol a organisa e e proyecto “Nacht Museum”. Un anochi ameno unda famia y comunidad di Aruba por a presencia loke e alumnonan a prepara pa varios luna. Alumnonan di eerste y tweede mester a busca un personahe cu a haci influencia den comunidad di Aruba of San Nicolas. Unda cu e alumno mester a haci un entrevista cu e personahe, traha un relato, haci un presentacion y e anochi nan ta haci exposicion di e personahe. E alumnonan di derde klas a haci presentacion di cuminda di un pais den Caribe y e anochi ey nan a bende e cumindanan. E alumnonan ta haya un cifra pa nan presentacion. Ademas di esey e alumnonan a duna diferente show cu tambe ta wordo evalua cu un cifra na final. Un actividad sumamente bunita y impresionante cu e alumnonan a presenta. Minister Endy Croes ta felicita e alumno y docentenan cu e bunita y exitoso proyecto.
