ORANJESTAD – Dialuna mainta Minister Dangui Oduber tabata na baby Beach caminda e a anuncia cu ta sigui traha ariba e masterplan di Seroe Colorado den e caso aki e proyecto di Baby Beach, anunciando e Fase 3 di Baby Beach su MasterPlan. E proyecto aki ta bay eleva henter e area rond di e playanan aki teniendo na cuenta e importancia di conserva nos naturalesa, creando asina un desaroyo di embeyesimento di e area na un manera sostenibel.
E mandatario a menciona tambe cu e proyecto aki mester a keda cla caba pero door di henter e pandemia, e proyecto tabata tin un retraso di 2 aña. E pandemia a haci cu e fondonan a bira mas limita, despues di sinta na mesa na un manera hopi creativo a dicidi cu ta bay sigui cu e proyecto tog pero lo bay ehecuta esaki den diferente fase.
Minister a trece dilanti cu ya caba Fase 2 di e proyecto di Baby Beach ta den pleno ehecucion caminda entre otro ta construiendo un area di parkeo completamente nobo, iluminacion nobo y un retonde nobo, cual tambe ta parti di e plan aki. Ta bay tin bañonan publico pa tur bishitante, lo pone tambe dos kiosko caminda hende por bay cumpra cuminda y/of bebida. E meta ta pa e kiosko nan aki refleha e cultura Arubano y bende cuminda nan cu ta tipico den e area di Caribe.
Den Fase 3 lo renoba e 2 tennis court, tambe lo traha riba un court multifunctional cu por wordo uza pa beach tennis, beach volley y beach soccer. E gazebo mei mei di e tennis courtnan lo bira un restaurant y lo renoba e trapi banda di esaki tambe uzando arte di mosaic. Tambe ta bay hala e turtle wall mas atras, yena e area cu santo blanco pa asina haci e beach mas grandi.
Minister Oduber a menciona tambe cu pa Rodgers Beach tambe tin un proyecto similar caminda tambe lo bay construi area di parkeo, iluminacion, construi kioskonan pa bende cuminda y bebida. Aki tambe lo bay hala e caminda mas atras, traha un turtle wall y haci e beach mas grandi.
E bestek pa Fase 3 ta disponibel caba na DOW pa cumpra, esaki ta bay pa 350 florin. Pa e promer kwartal di 2023 lo start destaho pa renoba e tennis courtnan. Pa cu e gazebo mei mei di e courtnan, lo percura pa partner cu DOW y DIP pa ehecuta un openbaare prijsvraag y laga e contratista bin cu su mesun diseño y ehecucion.
Turismo ta e driver di nos economia y pesei su desaroyo ta keda un prioridad. E gobierno aki ta para pa turismo di calidad, e turista cu ta bin pa calidad y pa contrubui na nos economia. Pesey ta hopi importante pa sigui inverti den e poducto Aruba. E proyectonan aki ta bay trece mas actividad pa San Nicolas pa asina percura cu e turista ta bin San Nicolas pa crea mas actividadnan economico. San Nicolas tin tur e potencial pa haya su fair share den e desaroyo di nos pais.
Minister Oduber ta convenci cu e proyecto aki lo fungi como catalisado pa tur otro proyecto di sector priva cu lo sigui den e area aki. E proyecto aki ta posibel danki na un bon teamwork y cooperacion entre ministerio di Turismo, ATA, DOW y DIP. Sigur un proyecto importante pa e area di Seroe Colorado cu tambe ta haya su desaroyo.
Cu accionan concreto y no cu plannan fantasma minister Oduber ta percurando pa proyectonan wordo ehecuta cu lo duna un balor agrega na producto Aruba.
