ORANJESTAD-Durante tratamento di presupuesto 2023, e tema di poder di compra, prijs di awa y coriente a bin na discusion. Minister Croes a splica cu gobierno ta trahando riba e proceso di aumento di salario minimo. Actualmente gobierno a ricbi caba e conseho di Directie Arbeid Onderzoek (DAO) y ta wardando riba e conseho di Sociaal Economisch Raad (SER) pa por entrega un proposicion na ministerraad. E aumento di salario minimo ta poni pa drenta na vigor entrante Januari 2023. Unabes cu e aumento aki tuma luga, esaki, automaticamente lo tin un efecto positivo riba e poder di compra di e cuidadanonan.
Minister Croes a sigui splica cu gobierno ta consciente di e dolor cu pueblo ta bibando na e momentonan aki. E pandemia a afecta mundo henter, drasticamente. Aruba mester a haci un debe grandi, prestando placa di Hulanda, pa por a yuda cu loonsubsidie. E ambtenaarnan a sacrifica por medio di FASE pa asina yuda esnan den sector priva pa por cobra algo di nan salario. Na e momento aki, Aruba tin un debe astronomico cu gobierno di Hulanda, cual debe ta desgraciando pais Aruba. Tur esaki lo por a wordo evita si no tabatin e debenan astronomico haci durante Gabinete Mike Eman I y II.
Minister Croes a indica cu si e debe acumula pa Gabinete Mike Eman no tabata existi, Aruba mes lo por a responsabilisa su mes pa e debenan di pais Aruba cu a surgi durante pandemia. Esaki lo por a evita cu awe gobierno mester tuma decisionnan dificil cu ta afecta nos pueblo manera ta e caso aworaki. Pa hopi ta facil pa culpa gobierno sin tene cuenta cu loke ta pasando rond di mundo. Mester por compronde kico ta pasando rond mundo, ora ta papia di “energy prices” y inflacion.
Gabinete Wever-Croes II ta trahando duro y haciendo nos maximo esfuerso pa traha na bienestar di pais Aruba. Na e momento cu Web Aruba NV laga e compra di HFO y bay over na LNG, lo trece un reduccion drastico den e tarifa di awa y coriente.
Cu e “switch” aki Aruba lo tin un prijs di gas fiho. Tambe e industrianan cu lo wordo desaroya riba e zona di refineria, lo tin un efecto positivo y beneficioso riba e tarifa di
awa y coriente. E desaroyo, progreso, industrianan nobo renobabel y sostenibel, y diversificacion di nos economia lo bay crea e forsa tambe pa yuda e reducion di awa y coriente.