Home Politics Minister Maduro a haya bishita di dr. Jean-Paul Ngome Abiaga hefe di...

Minister Maduro a haya bishita di dr. Jean-Paul Ngome Abiaga hefe di e programa di Ciencia Natural y Oceanico pa UNESCO den Caribe

SHARE

Den cuadro di aumenta presencia di UNESCO su programa di Ciencia Natural y Oceanico den Caribe Hulandes en particular Aruba, Minister di Finansa y Cultura tabata tin bishita di dr. Jean-Paul Ngome Abiaga y dr. Marck Oduber. Señor Ngome ta hefe di e programa di Ciencia Natural y Oceanico pa UNESCO den Caribe y ta hefe interino di IOCARIBE. IOCARIBE ta e oficina regional di e Comision Oceanografico Intergubermental di UNESCO (COI), cu ta responsabel pa e area di Merka te Brazil, incluyendo Caribe. Señor Oduber a acompaña señor Ngome como liaison di Ciencia pa UNESCO Aruba. Fuera di e reunion cu Ministerio di Finansa y Cultura, señor Ngome a reuni cu Gobernador, Minister Ursell Arends, Minister Geoffrey Wever, Presidente di Parlamento, hefe di commission Parlamentario di Medio Ambiente, hefe commission Parlamentario di SDG y diferente departamentonan y instancianan di Aruba.
Diferente topiconan relaciona cu COP27, COP15 y e UN Water Conference relaciona cu UNESCO su programanan a wordo discuti. Adicional a sondia e posibilidadnan pa UNESCO yuda Aruba den diferente topiconan relaciona cu Ciencia Natural. A sondea tambe e posibilidad pa Aruba bira anfitrion di e reunion regional intergubermental di IOC-UNESCO den 2023. Den e tipo di encuentronan asina ta discuti diferente temanan regional urgente relaciona cu ciencia di lama, incluyendo maneho di areanan costera, planificacion spacial maritimo y ta brinda oportunidad pa adapta e plan regional pa ciencia di lama den cuadro di decada Oceanico di Nacionan Uni.
Señor Ngome a aplaudi Aruba su intencion pa aumenta e parke-nan marino. E intencion ta pa sondea e posibilidad pa obtene e nominacion di UNESCO pa parke bioferico, y/o geoparke. Señor Ngome a indica cu UNESCO ta habri pa yuda Aruba cu su planan.