1
Patrick Paskel cu Speed Andrade no ta gusta mi. Prome nan a cuminsa cu “e no tin caya”. Nan a sigui “Evelyn a priminti e un number riba lista di MEP”. Despues nan kier bende mi como un fracaso cu no por haya voto. E motibo pa tanto odio ta obvio. Mi ta combatiendo e sistema di patronahe politico y di corupcion cu ta empobreciendo nos hendenan den un forma structural. Sin embargo ta hustamente e sistema ey a yuda enrikece Patrick cu Speed. E rapport di RDA ta mustra cu bao di Mike Eman y Mike de Meza RDA a bira un neishi di AVP. E casonan penal di Speed ta mustra cu el a soborna polis pa ta prome den noticia. Asina 24ora a bira un imperio mediatico danki na un sistema corupto. Nan rabia ta cu e acogida di mi palabranan ta creciendo. Esey ta un peliger pa nan imperio y nan cartera.
Toch tin tres cos cu mi ta haya straño na e manera con Patrick cu Speed kier ataca mi. Na prome luga nan kier play victima, mientras ta nan ta e gigante mediatico na Aruba. E duo kier nos haya duele di nan: ay ta pica pa “los pobrecitos”. Na di dos luga mi ta haya straño cu nan a scohe e manera di mas hipocrita pa ataka: nan kiermen cu mi ta lastra nan, mientras henter nan show ta draai rond di lastra hende na smaak. Mas hipocrita cu esey bo no ta haya. Na di tres luga mi ta haya nan yoradera straño, pasobra ta nan mes a cuminsa e guera. E guera entre ami cu e duo aki a cuminsa riba Enfoke dia cu mi a voto PRO e presupuesto 2024. E dia ey Speed a cuminsa cu su campaña di insulto, obviamente pa defende AVP y mal gobernacion financiero.
Desde e tempo ey nan rabia y odio contra mi a sigui crece, pasobra mi textonan ta dal nan duro cu e berdad y berdad ta pica lenga. Pero, mi mester admiti cu tin biaha mi ta sinti duele di nan. P’esey mi ta duna Patrick un man si mi mester dal den dje of mi ta pone mi man riba schouder di Speed ora mi wak e den Kowloon. Los di nan inclinacion pa ataca husticia y defende bandides, mi ta kere cu nan comportacion di bullying probabelmente ta sconde un vulnerabilidad emocional. Si esey ta e caso, nan tin mester di un mecanismo emocional pa nan sinti bon cu nan mes. Nos tur sa cu ambos a lucha cu obesidad extremo y a wordo ridiculisa pa nan peso. P’esey nan agresividad verbal por ta un refleho di nan lucha cu autoestima abao, un mal imagen corporal y sentimento di rechaso. Ken sa si nan tabata victima di abuso y asina bullying a bira un salida pa emocionnan negativo?
A pesar di e guera di Patrick cu Speed contra mi, awe mi tin 1000 voto riba mi nomber. Esey ta cinco biaha mas voto cu tempo cu 24ora tabata stima mi ainda. Nan tabata stima mi, pasobra mi tabata den AVP. Pero, ni cuanto nan purba bende mi como fracaso, e realidad ta cu di tur 21 parlamentario cu ta sinta den Staten ta mi persona a haya e crecemento mas grandi den voto (500%). Anto ningun otro parlamentario mester a bataya cu e gigante 24ora nan so, cu tiki recurso y cu plataformanan alternativo.
Pa loke ta trata e contenido di nan atake, mi contesta ta masha simpel: e 1000 voto cu mi a haya ta refleha cresemento, determinacion y curashi. E 1000 voto cu mi a haya ta un prueba cu principionan y perseverancia ta mas importante cu e odio y rencor di cualkier pobresito. Mi biahe apenas a cuminsa. Cada obstaculo ta hasi mi mas fuerte, y cada voto ta un confirmacion cu politica sincero y di contentido ta e futuro real.
Tur cu ta soña di un cambio real: durf di para pa loke bo ta kere. Cana e caminda dificil cu mi. Pasobra al fin, nos fe y curashi lo vence tur bos y media maligno. Nos fe y curashi lo habri caminda y lo inspira otro.
