Oranjestad – Sr. Eloy ‘Loy’ Koolman a nace na Aruba riba dia 21 di september 1932 y a bay laga nos riba dia 11 di october 2022. Eloy tabata yiu di Juan Romualdo Koolman y Anna Clara Ras. E tabata biba na Rooi Koochi # 10-A. Eloy a casa cu Nicolasita D. Wouters. For di nan matromonio, nan a ser bendiciona cu tres yiu. Esta Eloy Beltrando, Mary Madelene y Ester Maria. A sigui pa nieto y nietanan, bisnieto y bisnietanan.
Despues cu el a termina su estudio basico y avansa, Loy a bay traha na LAGO Oil & Transport Company Ltd. LAGO a cera despues riba dia 31 di maart 1985. El a cumpli 35 aña di servicio.
Na LAGO El a traha den e seccion di Inspeccion di Petroleo den laboratorio y a avansa den diferente posicion. LAGO a cera, pero despues di esey a bolbe contract’e pa un periodo cortico den laboratorio.
Loy ta un fotografo y periodista certifica, motibo pa cual el a yuda tambe den Departamento di Aruba Esso News di e compania Lago na varios occasion.
Eloy su logro y contribucion na Aruba en general y na Savaneta en particular, ta hopi.
Na 1972, Manager di Conhunto Los Harmonicos y lider di bario di parti di partido M.E.P. pa Savaneta.
Na 1974, President di Olimpic Flying Park na Rooi Koochi.
Na 1975, President/Vice President di S.V. Racing Club Savaneta y president di Savaneta Boating Club.
Na 1979, Vice President di S.V. La Fama; prome president di Carnaval Comite na Savaneta; prome president di Centro di Bario Savaneta.
Miembro di:
Aruba Volleyball Association; Aruba Spearfishing Association; Aruba Scuba Diving Association; Stichting Monument y Fundacion Betico Croes na 1986.
Loy tabata den e prome grupo di Verkennerij di St. Hyacinthius Groep; El a yega di hunga futbol y softball pa Savaneta tempo di su hubentud. Eloy a pasa Dande pa 68 aña largo riba Aruba. Cu su mesun grupo pa 40 aña largo.
DANDE:
Na 1974, Eloy a participa na e prome Festival di Dande na Conny Francis Club, na Santa Cruz cu Conhunto Los Harmonicos. E tabata un comienso masha bunita pa nan como Conhunto Los Harmonicos y pa Sr. Harry Croes cu a principia cu e Festival di Dande di Aruba na Conny Francis Club.
E tempo aya Eloy a participa como seis biaha. E prome biaha El a participa cu e Conhunto Los Harmonicos. Di dos biaha nan a logra den e di dos premio. E tempo ey Sr. Fany Ras a sali na di prome premio, na 1975. Anto despues nan a sigui participa y competi na dicho festival. Esun cu a canta Dande semper pa e conhunto ta Mario Koolman su ruman cu conhunto Los Harmonicos. Despues nan a bini cu e Dande di tambu. Eloy a bisa cu e Dande di Tambu ta na Brazil, nan a bini cune. Esaki no tabata existi prome, segun Eloy. Ta e Dande di Pieter Leoncio Koolman y Anna Maria Noguera ta esey tabata existi. Despues nan a bini cu e Dande di Tambu.
Aki tabata trata di mama cu yiu, anto e mama tabata toca tambu y e yiu tabata canta y e tabata tambe toca e triangel/Trianga di Ma Rosa, di kende nan tabata fia e trianga pa toca cu e tambu y e trianga, e Dande.
Asina tabata toca e Dande antes, Eloy a yega di conta den un entrevista pa DCA. Despues a bini e viol/fio, wiri, tambor, accordion, guitara tre y diferente instrumento musical.
Y semper Eloy tabata agradecido cu Sr. Harry Croes, kende a bini cu e Festival di Dande cu awe pa hopi aña caba y por bisa awe di por lo menos den su 48 aña caba Harry ta cu e festival. Y awe nos por tuma nota cu su yiu muhe Jessica Croes ta sigui cu e Festival di Dande Aruba.
Asina bo tin Harry y awe Jessica ta sigui yuda tene nos cultura y nos folklore, pasobra Dande ta di nos Tradicion.
Semper Eloy tabata boga pa ban mantene loke ta di nos cultura y loke tabata di e indjan y Arubianonan. Y si nos laga e cay, nos lo no tin nada mas. Sikiera esey nos por keda cune como recuerdo…Esakinan ta loke Eloy a trece den un entrevista.
Na 1990, Eloy a yuda Savaneta haya asfalt rond di Misa y e scolnan. Tambe atraves di recoge firma pa Rooi Koochi, Sero Alejandro y Yara haya palo di luz el a logra esaki; Loy a yuda Savaneta haya renobacion di e Kleuterschool, Prome Paso Kleuter School y tambe e sala di ehercicio.
Na 1992, E tabata comisario di Volkskredietbank. Loy tabata musico, compositor y componente di Trovadores Folklorico. E grupo a graba un CD cu musica di antaño; Savaneta ta orguyoso di e gran Savanetero aki.
Pero Aruba henter lo keda corda Eloy ‘Loy’ Koolman como un pilar di bario di Savaneta, Pilar Cultural den nos Dande y e Cacique di Savaneta. Nos Gran Savanetero.
Fin
==============================
Informacion ricibi di Sr. Dufi Kock, su Buki Historia di Savaneta, Su nieto Brandon Dirksz y su yiu Ester Koolman
Compila pa Sr. Stan Dabian
Brandon Dirksz ta splica e potretnan::
-Eloy tabatin e honor di a saca potret cu Ex-presidente di Venezuela sr. Carlos Andres Perez. E tabata hopi orguyoso di esey.