No tin un heroe ni un ehempel mas grandi cu e mayornan di un mucha. Ora muchanan ta hopi chikito nan ta imita tur loke nan mayornan ta haci y ta bisa. Mayornan ta e modelo cu nan ta anhela pa sigui. E muchanan ta crece admirando nan mama y tata sea cual sea e ehempel. Pesey, como mayornan nos mester ta consciente di e impacto cu nos ta crea den nos yiunan. Nos no por djis siñanan tocante di respet, bon manera, eticanan, principionan y bon habitonan; “nos mester duna ehempel di esakinan den nos estilo di bida diario.” No tin un poder y influencia mas grandi cu esaki. E conexion y amor cu ta existi entre e mayornan cu nan yiu, ta determinante pa cu nan desaroyo. E ta precisamente den edad hoben di e muchanan, cu e mayornan tin e oportunidad pa forma e caracter, moral, habito, rasonamiento y motivacion den nan.
Di e mesun manera nos por influencia nos yiunan positivamente, e ta posibel pa haci net lo contrario tambe. Si e mayornan ta siña y modela un estilo di bida vulgar, immoral y tambe cu mal custumbernan, bo yiunan lo bira grandi y expresa y deshaci cu bo di e mesun manera. Hopi biaha mayornan y famianan ta hari ora muchanan chikito di 2-3 aña di edad ta papia palabra malo y ta manda hende te aya cu su palabranan grosero. Imagina bo, ki tipo di respet e lo tin pa bo como mayor ora e tin 13 aña? Ki tipo di etica e lo tin den su bida personal? Con e lo trata otro hende si semper su modelo tabata uno di mal ehempel? Ora e yiunan bira grandi y ta falta respet y bringa cu mayornan, ta pasobra nan no a haya e guia corecto na cas of pasobra e respet aki no a wordo inculca ni modela na nan.
Cria bo yiunan y modela un estilo di bida cu virtud y amor. Demostra un caminda di decencia, humildad, respet, trabao duro, disciplina y control propio, pa ora nan bira grandi esaki por ta e fundeshi cu lo yudanan tin exito den nan labor profesional pero tambe den nan relacionan personal. Di e forma aki nos ta sembra simiyanan di virtud y caracter den nos yiunan cu lo preparanan pa ta ciudadanonan ehemplar den nos sociedad y den e hogarnan cu nan ta bay forma. Siñanan aprecia y stima e grandinan, nan bisiñanan, nan cultura y nan pais. Cu cada gesto, palabra y guia corecto cu nos ta duna nos yiunan nos ta crea un comunidad mas fuerte y mas sigur pa un y tur.
Si pueblo desea mas informacion di e articulo aki, contact mi na tel: 528-4639 of email mi na: [email protected] / Bo parlamentario y sirbidor di pueblo na bo ordo semper!