OAA a muda pa edificio di EPB Hato.
ORANJESTAD: Diaranson ultimo sr. Carlos Martinus a splica cu na luna di juni a cuminsa cu proyecto di “Openbare AvondLeergangen Aruba” (OAA) y na luna di september a logra muda pa e edificio di EPB. Sr. Martinus a relata loke a pasa den e ultimo 3 simannan. Segun sr. Martinus dia 15 di september a organisa un anochi di informacion pa alumnonan cu falta pa finalisa nan estudio pa motibo cu scol tabata cera debi na e Pandemia di Covid 19, pero tambe door di e cambio den directiva etc. OAA ta hincando un programa den otro pa brinda tur e alumnonan e oportunidad pa finalisa nan estudio. Dialuna ultimo tabatin reunion cu cuerpo docentenan pa informa nan kico ta e plan nobo di OAA y e entusiasmo ta grandi. Sr. Martinusa indica cu OAA ta bay cuminsa den un concepto nobo usando E-Leaning y cu nan ta bay hacie conhuntamente ROVC di Hulanda. ROVC ta na Aruba di 10 pa 14 di october proximo pa duna training na docentenan “Train the Trainer’.
OAA ta bay inicia cu e estudionan di:
- Monteur Elektrotechnische Installaties, MBO niveau 2
- Monteur Koude- en Klimaatsystemen, MBO niveau 2
ROVC ta bin pa purba acredita e companianan y tambe tur studiante cu termina e estudio ta haya un carchi y ta dune e poder di brinda servicio den p.e. mantencion di airco. E meta ta pa den futuro tur persona cu traha riba airco ta certifica. Sr. Martinus a splica cu ora e studiantenan termina nan estudionan, nan diploma ta reconoci. Entre 10 cu 14 di october tin un anochi di informacion pa tur alumnonan nobo pa haya instruccion. E estudionan ta wordo personalisa. Tur estudio tin mes un trayecto pero por finalisa den seis luna, otro den 8 luna y otro kisas den dos aña. E meta ta pa e alumno caba su estudio mas lihe posibel pa por contribui na e mercado laboral.