E siman aki ta tumando luga e conferencia bi-anual Aruba Meets Europe (AME) organisa door di Aruba Tourism Authority (A.T.A.), Aruba Hotel and Tourism Association (AHATA) y Aruba Airport Authority (AAA).
E conferencia interactivo aki lo consisti di participatenan di tour operators, representantenan di aerolineanan, hoteleronan y representantenan di Aruba den e mercado, tur dedica na e promocion di e isla como un destino di vacacion na Europa. E aña aki, ta conta cu participacion di 47 participante di diferente pais.
E recepcion di apertura a tuma luga na Amsterdam Manor Beach Resort. Durante e recepcion aki Ronella Croes- CEO di A.T.A., Jurgen van Schaijk- Managing Director di Amsterdam Manor Beach Resort, Joost Meijs- CEO di AAA y Tirso Tromp- Director A.T.A. Europa a hiba palabra.
E obhetivo principal di AME ta pa percura e industria cu e ultimo update riba Aruba su productonan y desaroyo, como tambe duna oportunidad na esnan cu ta participa pa prome biaha, pa duna un introduccion na nos destinacion na un manera interactivo.
Paisnan cu ta participa e aña aki ta Hulanda, Belgica, Alemania, Italia, Suecia y Reino Uni.
Den e prome 8 lunanan di 2022 e mercado Europeo a atribui na 58,970 bishitante cuta 8% di e bishitantenan cu Aruba a ricibi durante e aña te cu awo. Esaki sigur ta un mercado cu un potencial grandi pa sigi desaroya.
E conferencia ta inicia cu un recepcion di bonbini, sigui diamars mainta cu e apertura oficial unda lo bay tin diferente presentacion. AME ta tuma luga te cu dia 29 di september cu programa amplio y interesante.
Ta bay tin e acustumbrado Vitrina Turistico na unda e participantenan lo conoce y papia cu ehecutivonan local den turismo pa asina haci negoshi y crea/fortalece relacionnan duradero. Durante nan estadia nan lo bishita varios hotel y lo participa den diferente experiencia rond di nos isla.
