Home Politics Parlamentario Shailiny Tromp-Lee (MEP):  E siman aki tawata uno positivo pa...

Parlamentario Shailiny Tromp-Lee (MEP):  E siman aki tawata uno positivo pa desaroyonan riba tereno di salud mental

SHARE

 

 

Dialuna a habri pais Aruba cu un tremendo noticia for di parti di Minister di Husticia y Asuntonan social unda cu el a anuncia cu diabierna 12 di augustus conseho di minister a aproba 600 mil florin pa e proyecto di bemoeizorg. Dos dia despues di e anuncio aki, Minister Rocco Tjon ta haci un otro conferencia di prensa y e biaha aki tawata pa pone e prome piedra di Stichting Hunto unda oficialmente ta start e construccion di e edificio cu lo uni FMAA y SPD.

 

Proyecto Bemoeizorg

E proyecto aki tin como meta pa elimina e adictonan ambulante for di riba caya na un manera pro-activo y asina brindanan e cuido y ayudo necesario pa nan por rehabilita y bira ciudadanonan independiente y activo bek den comunidad. Durante conferencia di prensa Minister Tjon a elabora riba e alocacion di e 600 mil florin. Ta asina cu a emplea 5 profesional dedica y cualifica pa atende full-time cu e problematica aki. Tambe a aloca parti di e fondo pa tur herment necesario por wordo adkiri y asina reenforsa y facilita e trabou di nos profesionalnan. Ademas di esaki lo tin cambionan infrastructural unda a aloca 100 mil florin pa renoba 2 camber na Centro Colorado cual ta nifica cu lo tin cama pa entre 16 cu 24 persona. Brinda e personanan aki ayudo y cuido necesario no ta nifica solamente ayudo psikico, pero tambe cuido di higiena, provee cuminda y otro aspectonan basico. Tur esakinan ta cosnan cu a tene cuenta cun’e na momento di aloca e fondonan. E meta ta pa haci e proyecto aki un proyecto structural y duradero pa asina garantisa e cuido di clientenan na tur momento. E inversion aki tin un impacto positivo riba e adicto ambulante brindando e asina un oportunidad mas den comunidad. Tambe e ta un desaroyo positivo pa e famia y sigur e inversion aki ta eleva e siguridad di pais Aruba. 

 

Stichting Hunto

Pa hopi aña caba Aruba tawata campa cu e problema riba e tereno di salud mental cu listanan largo di espera, ineficiencia y e falta di un cuido enfoca riba mucha y hoben. Mirando tur esakinan, Gabinete Wever-Croes a declara asuntonan di salud mental como un crisis y for di aki a cuminsa lora manga y busca solucion. FMAA y SPD ta e dos organisacionnan cu a indica e necesidad grandi haci e cuido accesibel, enfoca riba clientenan cu dubbele diagnostiek y enfoca riba mucha y hoben. Abase di esaki e idea di Stichting Hunto a nace cu e intencion pa uni FMAA y SPD den un solo fundacion y di e forma aki haci e cuido cu nan cada un ta brinda uno accesibel, atencion dubbele diagnostiek y atencion special pa mucha y hoben. Pa cristalisa e proyecto aki tawata mester un cooperacion di tur stakeholders envolvi cual ta FMAA SPD HAVA, Respaldo, DVG, Bureau Ondersteuning Verslavingszorg, FADA y Ministerio di Husticia y Asuntonan Social. Danki na esaki e ta posibel awo pa yuda cada un persona mehora, rehabilita pa asina nan por integra bek den comunidad. Stichting Hunto lo garantisa un cuido di calidad, integral y cu ta accesibel pa tur cu mester di dje. Esaki sigur lo conduci na reduci fragmentacion den sector di cuido, ta bay reduci lista di espera largo y lo reduci e precion actual riba cuido specialisa. 

 

Parlamentario Shailiny Tromp-Lee ta termina felicitando tur profesional, tur stakeholders, y Ministerio di Husticia y Asuntonan Social pa a haci e dos proyectonan aki un realidad.