Home Politics Premier Evelyn Wever – Croes STICHTING HUNTO TA ILUSTRA E PRIORIDAD...

Premier Evelyn Wever – Croes STICHTING HUNTO TA ILUSTRA E PRIORIDAD DI GABINETE WEVER – CROES II PA ATENDE CU PROBLEMA DI SALUD MENTAL 

SHARE

 

“E ta tuma vision, curashi y determinacion pa logra cosnan grandi asina.”

 

ORANJESTAD – Prome Minister Evelyn Wever – Croes conhuntamente cu Minister encarga cu Asuntonan Social y Husticia Rocco Tjon, a pone e prome piedra pa e edificio cu lo bira Stichting Hunto. Esaki a tuma lugar den presencia di diferente Minister, Parlamentario y profesionalnan. Prome Minister Wever – Croes ta elogia henter e ekipo cu a uni hunto pa traha mas eficiente na un meta comun, salud mental. 

 

Manera a wordo anuncia recientemente, Gabinete Wever – Croes II a escala e maneho pa atende cu problema di salud mental na nivel di crisis, mescos cu ta haci den caso di otro sorto di calamidad. Motibo di esaki ta pa percura pa atende cu e problema cu e prioridad necesario, considerando cu e ta un problema hopi amplio.

 

Premier Wever – Croes a expresa cu aworaki ta saliendo for di e pandemia cu a afecta Aruba severamente. Den e periodo aki a siña cu mester tey pa otro, mester uni y haci cosnan hunto. Durante di e pandemia a atende diferente crisis pareu entre otro di salud, salud mental, crisis social, crisis financiero, crisis economico y crisis laboral. Aruba a uni y mustra forsa den union y sali for di dje. Awor economia ta recuperando, turismo ta bayendo hopi bon, tin cuponan di empleo nobo y ta atendiendo cu e crisis social. Sinembargo, un problema cu ainda ta hungando un papel importante ta e problema di salud mental na Aruba. 

 

Stichting Hunto ta bay ilustra e union di dos instituto cu pa hopi tempo a traha riba e tereno di salud mental, pero cu awo ta bay traha hunto. Ta trata di e institutonan: FMAA y SPD. Ora cu bo traha hunto, tin mas recurso y mas personal cu por atende cu e crisis mas mihor. Esaki riba su mes ta un logro hopi importante pa celebra. Prome Minister a sigui splica cu problema di salud mental ta prioridad di cada uno den comunidad. Tin hopi profesional cu dia den y dia afo ta lucha riba e tereno aki, pero awo ta pone esaki na nivel nacional y mustra henter Aruba cu di berdad tey pa yuda cada famia cu ta enfrenta cu reto di salud mental den famia. 

 

“Mi ta sumamente orguyoso cu den e vision di Gobierno, tin e extra atencion pa salud mental di nos muchanan. Pasobra cada mucha cu nos logra yuda na tempo, nos ta crea un adulto cu por tin hopi mas oportunidad den bida y cu por yuda su famia.” E aspecto aki Prome Minister ta haye hopi importante.

 

Concluyendo, Premier Wever – Croes ta gradici tur profesional pa nan dedicacion, profesionalismo y disponibilidad pa traha hunto den Stichting Hunto, pa asina bringa e problema di salud mental.  Ta felicita y gradici colega Minister Rocco Tjon y henter su ekipo di profesionalnan pa e logro importante aki. “E ta tuma vision, curashi y determinacion pa logra cosnan grandi asina.”